Mae pawb yn dweud wrthym ei bod hi’n syniad da i gynilo, ond ar gyfer beth yn union yr ydych yn ei gynilo ac ymhle y dylech chi gynilo? Darganfyddwch pam ei bod hi’n syniad da i gynilo’n rheolaidd beth bynnag yw’ch oedran yn ogystal â’r dewisiadau cynilo sydd ar gael i chi.
Beth sydd yn y canllaw hwn
Pam cynilo?
Mae tri phrif reswm pam y dylid cynilo’n rheolaidd:
- Ar gyfer argyfwng: i sicrhau bod arian ar gael petai rhywbeth annisgwyl yn digwydd, fel eich car yn torri i lawr. Darganfyddwch fwy am gynilion ar gyfer argyfwng.
- I dalu am bethau moethus: gallai hyn gynnwys priodas, blaendal ar gyfer eich cartref cyntaf neu bethau fel gwyliau neu gar newydd.
- I fyw’n gyfforddus yn y dyfodol: er bod hyn yn ymddangos yn bell i ffwrdd, unwaith y byddwch yn rhoi’r gorau i weithio bydd eich incwm yn gostwng ac mae’n debyg y bydd angen i chi ddibynnu ar arian yr ydych wedi ei gynilo er mwyn parhau â’ch safon byw.
Sut i gynilo
Cyfrifiannell cynilo
I’ch helpu i ddechrau cynilo, defnyddiwch ein Cyfrifiannell cynilo
Os fydd gennych arian dros ben ar ddiwedd yr wythnos neu’r mis, nad oes ei angen ar gyfer pethau hanfodol, ceisiwch ei gynilo.
Ystyriwch gynilo unwaith y byddwch wedi talu’ch prif filiau.
Os darganfyddwch ei bod hi’n bosibl gwneud hyn, yna ceisiwch roi rhywfaint o’ch incwm misol o’r neilltu i gyfrif cynilo.
Cynlluniwr cyllideb
I’ch helpu i reoli’ch arian, rhowch gynnig ar ein Cynlluniwr cyllideb rhad ac am ddim sy'n hawdd ei ddefnyddio.
Lle i gynilo
Os ydych yn talu’ch arian i mewn i fanc neu gymdeithas adeiladu, byddant yn talu llog i chi – ystyriwch hyn fel rhyw fath o wobr am ganiatáu iddynt edrych ar ôl eich arian.
Mae gan bob banc neu gymdeithas adeiladu ystod o wahanol gynnyrch cynilo ac mae pob un ohonynt yn talu cyfraddau llog gwahanol.
Y ddau gynnyrch cynilo mwyaf poblogaidd yw Cyfrif Cynilo Unigol (ISA) a chyfrifon cynilo.
ISA (Cyfrif Cynilo Unigol)
Mae’r rhain yn boblogaidd iawn gan eu bod yn ffordd ddi-dreth o gynilo neu fuddsoddi. Nid oes unrhyw Dreth Incwm na Threth ar Enillion Cyfalaf yn daladwy ar arian a gynilir mewn ISA.
Ar nifer o gynnyrch cynilo eraill byddech yn talu treth ar yr incwm a gewch. A gallech orfod talu Treth ar Enillion Cyfalaf ar unrhyw elw o fuddsoddiadau.
Gallwch gynilo £20,000 hyd at ddiwedd y flwyddyn dreth bresennol ym mis Ebrill 2024.
Gallwch gynilo mewn arian parod, buddsoddi mewn stociau a chyfranddaliadau, neu gymysgedd o’r ddau.
Darganfyddwch fwy am wahanol fathau o ISAs, yn cynnwys ISAs i Bobl Iau ac ISAs Oes y gallwch ei ddefnyddio i roi eich cynilion i mewn ynddo, yn ein canllaw Cyfrifon ISA a ffyrdd eraill sy'n effeithlon o ran treth i gynilo neu fuddsoddi
Cyfrifon cynilo
Mae bron pob banc a chymdeithasau adeiladu’n cynnig cyfrifon cynilo sy’n talu peth llog, a bydd nodweddion ychydig yn wahanol yn perthyn i bob un.
Fel arfer nid oes trothwy wedi ei osod ar faint y gallwch gynilo yn y cyfrifon hyn bob blwyddyn. Ac yn aml po fwyaf o arian a rowch i mewn, yr uchaf fydd y gyfradd llog a gewch.
Os ydych wedi cynilo hyd at drothwy eich ISA, efallai yr hoffech agor cyfrif cynilo ar gyfer unrhyw arian ychwanegol y gallwch ei gynilo.
Ymuno â’n grŵp Facebook
Ymunwch â’n grŵp preifat Budgeting and Saving Facebook am gil-dyrnau cynilo arian a chefnogaeth gan gymuned o gynilwyr.
Sut i ddod o hyd i’r cyfrif cynilo gorau
Mae nifer o bethau i’w hystyried ar gyfer cyfrif cynilo i sicrhau ei fod yn cwrdd â’ch anghenion. Mae’r rhain yn cynnwys:
- faint o log a delir
- pa mor sydyn y cewch chi dynnu eich arian allan os bydd angen
- yr isafswm o arian sydd yn rhaid i chi ei roi i mewn (un ai i agor y cyfrif, neu bob mis).
