Dydd Gwener y Gwario Gwirion: a yw'r bargeinion yn wirioneddol werth chweil?

Dyma'r ateb gonest - mae'n dibynnu. Mae rhai gostyngiadau Dydd Gwener y Gwario Gwirion yn cynnig gwerth gwych am arian. Mae eraill yn ymddangos yn gyffrous ond nid ydynt yn arbed llawer o arian i chi unwaith y byddwch chi'n gwneud ychydig o ymchwil.

Dyma beth sydd angen i chi ei wybod i siopa'n glyfar y Dydd Gwener y Gwario Gwirion hwn, p’un a ydych yn prynu, yn aros, neu’n dewis peidio â chymryd rhan o gwbl.

Dechreuodd Dydd Gwener y Gwario Gwirion yn yr Unol Daleithiau fel un diwrnod o ostyngiadau y diwrnod ar ôl Diolchgarwch. Ond mae wedi croesi’r Iwerydd ac wedi dod yn boblogaidd yn y DU hefyd.

Y dyddiau hyn, nid un diwrnod o ostyngiadau yn unig ydyw. Byddwch yn aml yn gweld "bargeinion Dydd Gwener y Gwario Gwirion cynnar" yn ymddangos ymhell cyn y diwrnod ei hun, tra bod manwerthwyr eraill yn cadw eu gostyngiadau mwyaf ar gyfer y diwrnod ei hun neu'n eu hymestyn i'r wythnos ganlynol.

Mae Dydd Gwener y Gwario Gwirion ar y dydd Gwener olaf ym mis Tachwedd bob blwyddyn. Ond mae llawer o fanwerthwyr yn dechrau eu gwerthiannau wythnosau neu ddyddiau ynghynt, ac mae nifer ohonynt yn cadw'r gostyngiadau tan Ddydd Llun Seibr (y dydd Llun ar ôl Dydd Gwener y Gwario Gwirion) ac weithiau y tu hwnt.

Dyma pam y gall deimlo ychydig yn ddryslyd ceisio gweithio allan pryd fydd y bargeinion go iawn yn digwydd.

Mae rhai bargeinion Dydd Gwener y Gwario Gwirion yn cynnig gwerth gwych am arian ond nid bob amser.

Nid yw gostyngiad enfawr o 70% o reidrwydd yn golygu eich bod chi'n cael pris gwych, neu fod angen y peth arnoch chi hyd yn oed yn y lle cyntaf.

Pan fyddwch chi'n siopa, mae bob amser yn werth gwybod arwyddion sgamiau Dydd Gwener y Gwario Gwirion a gwefannau ffug.

Cyn i chi brynu, mae'n werth gofyn i chi'ch hun:

1. Oes angen hwn arnaf mewn gwirionedd?
2. Oeddwn eisoes yn bwriadu ei brynu cyn i mi weld y gostyngiad?
3. A fyddwn i'n dal eisiau hwn pe na bai disgownt?
4. A yw hyn mewn gwirionedd yn arbediad neu a yw'r pris wedi’i gynyddu ymlaen llaw i wneud i'r disgownt edrych yn fwy?
5. Ydw i wedi cymharu'r pris yn rhywle arall neu ydw i'n edrych ar un siop yn unig?
6. A allaf ei fforddio'n gyfforddus heb fenthyca arian neu ddefnyddio arian sydd wedi’i neilltuo ar gyfer rhywbeth arall?
7. Ydw i'n prynu hwn oherwydd bod ei angen arnaf neu oherwydd bod yr amserydd cyfrif i lawr yn peri i mi deimlo dan bwysau?

Gall hyn eich helpu i osgoi prynu rhywbeth y gallech ddifaru yn nes ymlaen.

Am fwy o help, edrychwch ar ein blog am wario byrbwyll.

Nid yw pob gostyngiad "oedd yn £100, nawr yn £50" yn gyfreithlon. Dyma sut i wirio a yw gostyngiad yn ddilys:

1. Gwiriwch hanes y pris. Gall teclynnau olrhain prisiau ac estyniadau porwr ar wefannau ddangos i chi beth oedd rhywbeth yn ei gostio yn yr wythnosau cyn y gwerthiant, a all fod yn agoriad llygad.
2. Cymharwch brisiau ar draws ychydig o fanwerthwyr yn hytrach na chymryd yn ganiataol mai'r fargen gyntaf rydych chi'n ei gweld yw'r un gorau ar hyn o bryd.
3. Peidiwch â chanolbwyntio ar y ganran fawr yn unig. Gall gostyngiad o 70% ar rywbeth a oedd yn rhy ddrud i ddechrau gostio mwy na gostyngiad llai mewn mannau eraill.
4. Ystyriwch gostau danfon, oherwydd efallai na fydd eitem rhad gyda chostau postio uchel yn fargen mor dda wedi'r cyfan.
5. Ystyriwch warantau a pholisïau dychwelyd gan y gall y rhain ychwanegu at gyfanswm y gost.

Yn anffodus, nid oes ateb clir. Mae Dydd Gwener y Gwario Gwirion yn adnabyddus am gynnig bargenni da ar dechnoleg, nwyddau trydanol a nwyddau cartref. Tra bod gwerthiannau Dydd San Steffan yn aml yn canolbwyntio ar glirio stoc fel dillad, dodrefn ac unrhyw beth sy'n weddill o'r tymor Nadolig.

Os nad ydych ar frys, gall fod yn werth cymharu'r ddau gyfnod yn hytrach na chymryd yn ganiataol mai un yw'r opsiwn rhatach yn awtomatig.

Mae prisiau weithiau'n gostwng yn ystod y gwerthiannau clirio ar ôl y Nadolig a gwerthiannau mis Ionawr. Ond nid oes modd gwarantu hynny.

Dyma ychydig o bethau sy'n werth eu hystyried cyn penderfynu a ddylid prynu nawr neu aros:

1. A yw'r pris yn debygol o ostwng eto yn ddiweddarach yn y tymor?
2. A allai'r eitem werthu allan neu beidio â bod ar gael os ydych chi'n aros?
3. A oes ei angen arnoch chi cyn y Nadolig?
4. A yw hon yn fargen untro na fydd yn dychwelyd unwaith y bydd wedi mynd?

Os nad ydych ar frys, efallai y byddai'n werth aros i weld beth sy'n digwydd.

Yn meddwl am y Nadolig? Darllenwch ein blog ar 10 peth hanfodol i ychwanegu i'ch cyllideb Nadolig nawr a darganfyddwch cynilo arian ar gyfer y Nadolig.

Mae Dydd Gwener y Gwario Gwirion wedi'i gynllunio i greu ymdeimlad o frys drwy ddefnyddio clociau cyfrif i lawr, negeseuon "dim ond 2 ar ôl mewn stoc", a baneri sy'n fflachio. Er mwyn osgoi cael eich ysgubo ynghyd ag ef a gwario mwy nag yr oeddech wedi'i gynllunio, gallwch:

• osod terfyn gwariant i chi'ch hun cyn i chi ddechrau pori a cheisiwch gadw ato

• gwneud rhestr o'r hyn sydd eisiau ei brynu yn gyntaf yn hytrach na phenderfynu yn y fan a'r lle

• blaenoriaethu pethau sydd eu hangen arnoch dros bethau sy'n digwydd bod ar werth

• bod yn onest ynghylch a fyddech chi'n ei brynu beth bynnag. Os mai na yw'r ateb, mae'n debyg nad yw'r gostyngiad yn rheswm digon da ar ei ben ei hun

• canolbwyntio ar fforddiadwyedd, nid maint yr arbedion. Nid yw canran enfawr wedi’i dynnu yn gwneud rhywbeth yn fforddiadwy os nad oedd o fewn eich cyllideb i ddechrau.

A chofiwch, nid yw gwario £50 ar rywbeth nad oes ei angen arnoch yn arbediad, hyd yn oed os cafodd ei ostwng o £100. Os nad oeddech chi'n mynd i'w brynu beth bynnag, nid ydych wedi cynilo £50, rydych chi wedi gwario £50.

Gall cymryd yr amser i reoli'ch arian yn well dalu ar ei ganfed, darganfyddwch sut y gallwch chi wneud hyn yn ein canllaw i ddechreuwyr.