Cynlluniwr cyllideb
I’ch helpu i reoli’ch arian, rhowch gynnig ar ein Cynlluniwr cyllideb rhad ac am ddim sy’n hawdd ei ddefnyddio
Mae ymchwil newydd, a ryddhawyd ar gyfer Wythnos Siarad Arian y mis hwn, yn dangos bod mwy na 3 allan o bob 10 oedolyn yn y DU wedi talu am danysgrifiad nad ydynt yn ei ddefnyddio. Boed yn £6 am wasanaeth ffrydio neu £30 am y gampfa, gall taliadau rheolaidd bach gronni. Gall gwirio'r hyn rydych chi'n talu amdano eich helpu i ddod o hyd i danysgrifiadau nad ydych eu heisiau neu eu hangen mwyach.
Mae cymryd yr amser i ddarganfod pa danysgrifiadau rydych chi'n talu amdanynt yn ffordd gyflym o gadw rheolaeth ar eich gwariant misol.
Thema Wythnos Siarad Arian eleni yw ‘mae’r cyfan yn cyfrif'. Os ydych chi’n cymryd golwg a’n dod o hyd i dreial am ddim wnaethoch chi anghofio ei ganslo, neu danysgrifiad nad oeddech yn gwybod bod gennych, efallai y gallwch roi'r arian hwnnw mewn cynilion yn y dyfodol.
Canfu ein harolwg o 2,000 o oedolion yn y DU mai pobl rhwng 18 a 24 oed oedd y grŵp oedran mwyaf tebygol o fod yn talu am danysgrifiadau maent wedi anghofio amdanynt. Roeddent hefyd yn fwy tebygol o osgoi gwirio eu datganiadau banc, oherwydd eu bod yn poeni am yr hyn y gallent ei ddarganfod.
Cymerwch dri cham syml i sicrhau eich bod yn cadw rheolaeth ar eich gwariant ac nad ydych yn gwastraffu arian ar danysgrifiadau nad ydynt yn cael eu defnyddio.
Edrychwch drwy eich datganiadau banc a cherdyn credyd diweddaraf i chwilio am daliadau rheolaidd. Os gwelwch un, gwiriwch a yw'n rhywbeth rydych chi'n ei ddefnyddio'n rheolaidd mewn gwirionedd. Os nad yw, efallai y byddai'n werth ei ganslo.
Gall rhai apiau a gwasanaethau ddechrau gyda threial am ddim i'ch denu, ac yna dechrau codi tâl arnoch yn awtomatig. Gall y taliad ymddangos ar eich datganiad o dan enw gwahanol, felly gwiriwch unrhyw beth nad ydych yn ei adnabod. Weithiau, codir ffi flynyddol arnoch ar un waith, a gall hynny fod yn ddrud!
Mae hefyd yn werth gwirio eich siop apiau a hanes taliadau PayPal.
Os gallwch edrych yn ôl dros flwyddyn, efallai y byddwch hefyd yn dod o hyd i daliadau blynyddol sy'n adnewyddu'n awtomatig, fel yswiriant teithio.
Mae ein teclyn Cynlluniwr cyllideb yn eich helpu i gyfrifo’n union i ble mae eich arian yn mynd a faint y byddech chi'n ei arbed trwy ganslo'r gwasanaeth.
Rhowch y swm rydych yn ei dalu am eich gwasanaeth ffrydio cerddoriaeth neu aelodaeth clwb ac efallai y byddwch chi'n synnu faint mae’n ei gostio dros flwyddyn.
Bydd gan unrhyw danysgrifiadau sydd gennych ddyddiad adnewyddu. Dewch o hyd iddo a gwnewch nodyn yn eich dyddlyfr fel eich bod yn gwybod pryd i'w ganslo. Ar gyfer contractau blynyddol, dylech wneud hyn bum wythnos cynt yn ddelfrydol er mwyn osgoi colli’r cyfnod rhybudd (sy’n aml yn 30 diwrnod).
Hyd yn oed yn well, os gallwch roi’r gorau i’r tanysgrifiad cyn gynted â’ch bod yn cofrestru, bydd yn golygu y byddwch yn sicr o beidio anghofio’n nes ymlaen yn y flwyddyn. Os hoffech barhau gyda’r tanysgrifiad, mae’n ddigon hawdd cofrestru eto.
Os nad ydych yn ei ddefnyddio, peidiwch â thalu amdano. Ffoniwch, e-bostiwch neu ysgrifennwch at y darparwr i’w cael i roi’r gorau i’r tanysgrifiad. Gallai hyn fod yn anodd neu’n rhwystredig ar adegau ond daliwch ati!
Cadwch lygad ar unrhyw gosbau os ydych yn ceisio gadael yn gynnar, ond holwch a allwch gael ad-daliad hefyd – yn enwedig gyda thanysgrifiadau cylchgrawn.
Efallai y cewch gynnig gostyngiad i aros. Cyn ei dderbyn, meddyliwch a fyddwch chi wir yn defnyddio'r tanysgrifiad.