Cyfrif banc wedi’i rewi – beth ddylwn i ei wneud?

Gall banciau rewi eich cyfrif os ydynt yn amau twyll, gwyngalchu arian, gweithgaredd anghyfreithlon neu os oes gorchymyn llys wedi bod. Os yw wedi digwydd i chi, gall fod yn wirioneddol ofidus a dryslyd, yn enwedig os nad ydych wedi clywed yn uniongyrchol gan eich banc i esbonio pam. Ond mae'r rhan fwyaf o rewi cyfrifon yn fesurau dros dro i'ch amddiffyn chi a'ch arian, neu maen nhw wedi gwneud camgymeriad. Felly, os yw'ch cyfrif wedi'i rewi ar gam, gallwch gymryd camau i'w ddatrys yn gyflym.

Cysylltwch â'ch banc cyn gynted ag sy’n bosibl. Gofynnwch i siarad â'r tîm twyll, gan y gallant edrych ar eich cyfrif. Mae angen i chi weithredu'n gyflym i ddatrys pethau ac i amddiffyn eich sgôr credyd.

Efallai y bydd eich banc yn gofyn i chi am daliadau sy'n mynd i mewn neu allan o'ch cyfrif. Os oes gennych fynediad at fancio ar-lein, gwnewch nodyn o unrhyw beth anarferol fel ad-daliad treth, taliad budd-daliadau neu flaendal mawr.

Efallai y bydd y banc yn gofyn i chi brofi eich hunaniaeth neu i esbonio trafodion penodol. Dylech gael y pethau hyn wrth law:

• dogfen adnabod sydd â llun (fel pasbort trwydded yrru)

• prawf cyfeiriad (fel bil cyfleustodau diweddar neu ddatganiad banc)

• prawf o unrhyw daliadau neu flaendaliadau mawr (fel gwaith papur etifeddiaeth neu ddogfennau o werthu eiddo). 

Er bod eich arian wedi'i rewi, dylech allu cael mynediad at unrhyw 'gronfeydd sydd wedi’u heithrio' – mae taliadau fel budd-daliadau anabledd neu gynhaliaeth plant wedi'u heithrio rhag rhewi. Gofynnwch i'ch banc i gadarnhau y gallwch gael mynediad at y rhain.

Gofynnwch beth sydd ei angen arnoch chi i ddadrewi'ch cyfrif. Ysgrifenwch:

• enw'r person y gwnaethoch siarad ag ef

• y dyddiad a'r amser 

• yr hyn y dywedon nhw wrthych, a

• gofynnwch am esboniad clir o'r camau nesaf.

Gallwch wthio'n ôl os oes angen. Os nad yw'r banc yn helpu, esboniwch eich sefyllfa yn gadarn. Gallwch wneud cwyn ffurfiol tra’ch bod ar yr alwad.

Weithiau ni all eich banc ddweud wrthych pam mae'ch cyfrif wedi'i rewi ac ni fydd yn dadrewi'ch cyfrif pan fyddwch chi'n ffonio. Neu efallai y byddant yn dweud eu bod yn cau eich cyfrif.

Ceisiwch beidio â mynd i banig, mae yna rai pethau y gallwch chi eu gwneud:

Os oes gennych gyfrif arall, defnyddiwch hwnnw. Dywedwch wrth eich cyflogwr neu'ch cleientiaid am ailgyfeirio taliadau iddo hefyd. Os ydych chi ar fudd-daliadau, gofynnwch i'r darparwr adalw'r arian yn y cyfrif sydd wedi'i rewi a'i dalu i’r cyfrif hwn yn lle hynny.  

Cadwch lygad ar unrhyw filiau sydd angen eu talu o gyfrif amgen er mwyn i chi osgoi unrhyw drafodion a gaiff eu hatal a allai arwain at ffioedd neu effeithio ar eich sgôr credyd. 

Os ydych eisoes yn delio â dyled, siaradwch â rhywun a all helpu – defnyddiwch ein teclyn lleolwr cyngor ar ddyledion i ddod o hyd i gyngor cyfrinachol am ddim.

Rhowch wybod i bobl am eich cyfrif sydd wedi'i rewi cyn gynted ag sy’n bosibl - yn enwedig unrhyw un a allai geisio cymryd taliad oddi wrthych, er enghraifft ar gyfer biliau neu danysgrifiadau. Bydd gan y mwyafrif adrannau arbennig sy'n delio â'r math hwn o sefyllfa, ac maen nhw wedi helpu eraill cyn i’w cyfrifon gael eu rhewi.

Dechreuwch drwy gysylltu â'ch darparwyr gwasanaeth hanfodol, fel trydan, nwy neu ddŵr. Rhowch wybod iddyn nhw beth sy'n digwydd fel y gallant weithio gyda chi.

Os na allwch dalu eich rhent, siaradwch â'ch landlord neu'ch cymdeithas dai ar unwaith. Ni allwch gael eich troi allan dim ond oherwydd eich bod chi'n aros i gael mynediad at eich arian. Am fwy o help gyda materion rhent, gweler ein canllaw Help gyda chodiadau rhent, ôl-ddyledion ac osydych yn cael trafferth talu.

Efallai y byddwch hefyd yn gallu cael help ychwanegol ar gyfer costau brys. Er enghraifft, os ydych chi'n cael Credyd Cynhwysol ac na allwch dalu eich rhent oherwydd y rhewi, gallech wneud cais am Daliad Disgresiwn at Gostau Tai. Darganfyddwch am hyn a chymorth arall sydd ar gael yn ein canllaw Ble gallaf gael cymorth brys gydag arian a bwyd?   

Os yw'ch cyfrif wedi'i rewi oherwydd gorchymyn llys, gofynnwch am gymorth proffesiynol, a allai gynnwys ffioedd. Efallai y bydd rhai clinigau cyfreithiol am ddim yn gallu helpu – er enghraifft, mae LawWorks yn eich cysylltu â chyngor cyfreithiol am ddimYn agor mewn ffenestr newydd gan gyfreithwyr gwirfoddol.

Gall unrhyw ddeiliad cyfrif ar y cyd ofyn i rewi'r cyfrif. Ond dim ond pan fydd pawb yn cytuno sut i rannu'r arian y gellir ei ddatgloi. Os na allwch, efallai y bydd yn rhaid i chi adael i'r llysoedd benderfynu pwy sy'n cael beth. Darganfyddwch fwy yn ein canllaw Trefnu cyfrifon banc ar y cyd, yswiriant, biliau a chynilion arall â’ch cyn bartner.

Efallai na fydd eich banc yn dadrewi'ch cyfrif ac efallai y bydd yn ei gau. Mae gennych opsiynau o hyd.

Gallwch agor cyfrif newydd gan ddefnyddio ein canllaw Sut i ddewis cyfrif banc Gallwch ddefnyddio'r Gwasanaeth Switch Current AccountYn agor mewn ffenestr newydd i drosglwyddo'ch taliadau rheolaidd.

Rhowch eich manylion cyfrif banc newydd i'ch cyflogwr ac unrhyw ddarparwr budd-daliadau.

Os yw'ch cyfrif wedi'i gau ac mae marciwr CIFAS wedi'i roi arno (oherwydd bod eich banc yn meddwl bod twyll wedi digwydd), yna efallai y bydd angen i chi agor cyfrif sylfaenol. Darganfyddwch sut i wneud hyn yn ein canllaw Cyfrifon banc sylfaenol heb ffi.

Os nad ydych chi'n hapus gyda sut mae'ch banc yn ymdrin â'r sefyllfa, gallwch wneud cwyn ffurfiol. Bydd angen i chi fynd trwy weithdrefn gwyno eich banc yn gyntaf – darganfyddwch sut i wneud hyn ac os na chaiff ei ddatrys, yna gallwch fynd â'ch cwyn ymhellach i'r Gwasanaeth Ombwdsmon Ariannol

I leihau'r posibilrwydd y bydd eich cyfrif yn cael ei rewi neu ei gau eto:

• cadwch eich manylion cyswllt yn gyfredol gyda'ch banc

• rhowch wybod i'ch banc os ydych chi'n mynd i wneud unrhyw drafodion anarferol o fawr

• ymatebwch yn gyflym i unrhyw geisiadau am wybodaeth gan eich banc 

• cadwch gyfrif cyfredol ar wahân

• os ydych chi'n mynd i fasnachu mewn crypto, siaradwch â'ch banc yn gyntaf i wneud yn siŵr eu bod yn caniatáu hynny.