Os ydych chi'n gwneud cais am Gredyd Cynhwysol am y tro cyntaf – efallai oherwydd eich bod wedi colli eich swydd neu bod eich incwm wedi gostwng – gall helpu i wybod beth allai fynd o'i le a sut i wneud yn siŵr bod pethau'n mynd yn iawn. Dyma rai problemau cyffredin y mae pobl yn eu profi, a beth i'w wneud amdanynt.
Beth sydd yn y canllaw hwn
- Mae eich taliad Credyd Cynhwysol yn hwyr
- Talwyd y swm anghywir o Gredyd Cynhwysol i chi
- Rydych wedi cael eich gwrthod am Gredyd Cynhwysol
- Rydych am herio’r penderfyniad
- Rydych yn waeth eich byd ar Gredyd Cynhwysol
- Nid yw’ch Credyd Cynhwysol yn talu am eich gwariant
- Nid yw’ch Credyd Cynhwysol yn talu am eich rhent neu’ch morgais
- Ffynonellau cymorth eraill
Mae eich taliad Credyd Cynhwysol yn hwyr
Fel arfer mae’n cymryd pum wythnos i gael eich taliad Credyd Cynhwysol cyntaf. Ar ôl hynny, dylech gael eich taliad ar yr un dyddiad bob mis.
Os yw’ch taliad yn hwyr, mewngofnodwch i’ch cyfrif ar-lein a gadewch neges i’ch anogwr gwaith yn eich dyddlyfr.
Mewngofnodwch i'ch cyfrif ar GOV.UK.
Gofynnwch iddynt wirio a oes unrhyw beth ar goll o’ch cais a allai fod yn achosi’r oedi, fel prawf o’ch rhent neu’ch hunaniaeth. Mae DWP yn galw rhain yn ‘rhwystrwyr taliadau’
Os mai hwn yw’ch taliad cyntaf o Gredyd Cynhwysol gallwch ofyn am daliad ymlaen llaw. Mae hwn yn fenthyciad y bydd rhaid i chi ei ad-dalu o’ch taliadau Credyd Cynhwysol yn y dyfodol.
Gallwch ofyn am daliad ymlaen llaw hyd yn oed os nad yw’ch taliad yn hwyr.
Darganfyddwch fwy yn ein canllaw Taliad ymlaen llaw o Gredyd Cynhwysol
Defnyddio ein cyfrifiannell budd-daliadau
Os ydych chi’n byw ar incwm isel neu wedi cael sioc incwm, defnyddiwch ein cyfrifiannell Budd-daliadau i ddarganfod yn gyflym beth y gallech fod â hawl iddo.
Talwyd y swm anghywir o Gredyd Cynhwysol i chi
Gall faint o Gredyd Cynhwysol rydych yn ei gael newid o fis i fis ac mae’n anodd cyfrifo faint rydych yn mynd i’w gael.
Cewch syniad cyffredinol o beth fydd eich taliadYn agor mewn ffenestr newydd ar wefan Cyngor ar Bopeth.
Ffoniwch linell gymorth Credyd Cynhwysol os yw'ch taliad yn anghywir neu os nad yw'r arian yr oeddech chi'n ei ddisgwyl wedi'i dalu
Os bu camgymeriad gyda'ch taliad Credyd Cynhwysol, mae angen i chi ffonio'r llinell gymorth neu fewngofnodi i'ch cyfrif ar-lein a gadael neges i'ch anogwr gwaith yn eich dyddlyfr. Gofynnwch iddyn nhw esbonio'r swm i chi.
Gallwch ffonio'r llinell gymorth Credyd Cynhwysol am ddim ar:
Ffôn: 0800 328 5644Yn agor mewn ffenestr newydd
Ffôn testun: 0800 328 1344Yn agor mewn ffenestr newydd.
8am i 6pm, dydd Llun i ddydd Gwener (ar gau ar wyliau banc a gwyliau cyhoeddus). Mae galwadau am ddim.
Neu, mewngofnodwch i'ch cyfrif ar GOV. UK.
Rhowch dystiolaeth, os gallwch, i ddangos pam rydych chi'n meddwl eu bod wedi gwneud camgymeriad. Gallai hyn gynnwys:
- datganiadau banc neu slipiau cyflog
- anfonebau gan eich darparwr gofal plant
- prawf o'ch rhent.
Os ydych chi’n anghytuno â’r penderfyniad
Os ydych chi wedi ffonio'r llinell gymorth neu siarad â'ch anogwr gwaith, ac rydych chi'n dal i feddwl bod y taliad yn anghywir, gallwch fynd ag ef ymhellach.
Darganfyddwch fwy am beth i’w wneud os credwch fod eich penderfyniad budd-daliadau yn anghywir yn ein canllaw Sut i apelio yn erbyn penderfyniad am fudd-daliadau
Mae eich taliad Credyd Cynhwysol yn ymddangos fel £0
Mae sawl rheswm pam y gallai eich taliad Credyd Cynhwysol fod yn £0 am fis. Er enghraifft, roedd eich enillion (neu enillion eich partner os oes gennych gais ar y cyd) yn uwch na'r trothwy incwm yn ystod eich cyfnod asesu, neu gallech fod wedi derbyn incwm arall sy'n effeithio ar eich hawl.
Gwiriwch eich dyddlyfr ar-lein Credyd Cynhwysol, gan ei fod yn esbonio sut mae eich taliad wedi'i weithio allan. Os ydych chi'n meddwl bod camgymeriad wedi bod, cysylltwch â'ch anogwr gwaith neu linell gymorth Credyd Cynhwysol.
Mae eich taliad Credyd Cynhwysol wedi’i oedi neu'n hwyr
Os yw'ch taliad yn hwyr, mewngofnodwch i'ch cyfrif Credyd Cynhwysol a chysylltwch â'ch anogwr gwaith trwy eich dyddlyfr. Gofynnwch a oes unrhyw atalyddion taliad sy'n oedi eich hawliad.
Os ydych chi'n aros am eich taliad cyntaf ac rydych chi'n cael trafferth ariannol, efallai y byddwch yn gallu gwneud cais am Daliad Ymlaen Llaw Credyd Cynhwysol tra bod eich cais yn cael ei brosesu.
Rydych wedi cael eich gwrthod am Gredyd Cynhwysol
Os ydych chi'n cael eich gwrthod am Gredyd Cynhwysol, y cam cyntaf yw darllen y penderfyniad yn ofalus fel eich bod chi'n deall pam.
Yn dibynnu ar y rheswm, efallai y byddwch chi'n gallu:
- darparu gwybodaeth ychwanegol
- gwneud cais newydd os yw'ch amgylchiadau wedi newid
- gofyn am ailystyriaeth orfodol os ydych chi'n meddwl bod y penderfyniad yn anghywir.
Os ydych chi'n dal i anghytuno ar ôl i'r penderfyniad gael ei ystyried eto, efallai y byddwch yn gallu apelio.
Mae enillion eich cartref yn rhy uchel
Os yw'ch enillion chi - a’ch partner os ydych yn gwneud cais ar y cyd - yn ddigon uchel i olygu na fyddwch yn cael unrhyw Gredyd Cynhwysol mewn mis, bydd eich cais Credyd Cynhwysol yn cau.
Gallai hyn fod, er enghraifft, oherwydd i chi golli’ch swydd ond wedi cael eich cyflog terfynol ar ôl i chi gyflwyno’ch cais am Gredyd Cynhwysol.
Os yw’ch enillion yn debygol o ostwng, dylech ail-ddechrau’ch cais cyn gynted â phosibl. Mae hyn er mwyn sicrhau nad ydych yn colli allan ar unrhyw daliadau yn y dyfodol.
Ail-ddechreuwch eich cais trwy fewngofnodi i'ch cyfrif Credyd Cynhwysol yn GOV.UK.
Nid oes gennych ‘unrhyw hawl i arian cyhoeddus’
Os yw’ch statws mewnfudo yn golygu nad oes gennych ‘unrhyw hawl i arian cyhoeddus’, ni fyddwch yn gallu cael Credyd Cynhwysol.
Os ydych wedi bod yn gweithio ac yn talu cyfraniadau Yswiriant Gwladol, efallai y gallwch wneud cais am Lwfans Ceisio Gwaith dull newydd neu Lwfans Cyflogaeth a Chefnogaeth dull newydd yn lle.
Darganfyddwch a ydych yn gymwys gan ddefnyddio'r gyfrifiannellYn agor mewn ffenestr newydd ar wefan Policy in Practice.
Os nad ydych wedi talu digon o gyfraniadau Yswiriant Gwladol i fod yn gymwys, cysylltwch â’ch awdurdod lleol i ofyn am fanciau bwyd a chymorth lles lleol arall, fel y Crisis and Resilience Fund a phrydau ysgol am ddim.
Dewch o hyd i’ch cyngor lleol yn GOV.UK.
Rydych am herio’r penderfyniad
Os ydych yn anghytuno â’r penderfyniad i wrthod eich cais am Gredyd Cynhwysol, gallwch ofyn iddynt edrych arno eto - ac yna apelio.
Darganfyddwch fwy am beth i’w wneud os credwch fod eich penderfyniad budd-daliadau yn anghywir yn ein canllaw Sut i apelio yn erbyn penderfyniad am fudd-daliadau
Rydych yn waeth eich byd ar Gredyd Cynhwysol
Os ydych chi wedi symud i Gredyd Cynhwysol o unrhyw un o'r budd-daliadau a ddisodlwyd, mae'n bosibl bod gennych lai o incwm nag o'r blaen. Neu efallai na fyddwch chi'n gymwys o gwbl.
Gallai hyn fod, er enghraifft, os ydych yn byw gyda rhywun a bod eich incwm a’ch cynilion ar y cyd yn golygu nad ydych yn gymwys.
Os ydych eisoes wedi gwneud cais am Gredyd Cynhwysol a bod hyn wedi digwydd i chi, gofynnwch am esboniad trwy’ch cyfrif ar-lein. Os ydych yn anghytuno â’r canfyddiadau gallwch herio’r penderfyniad. Gofynnwch os dylech chi fod wedi cael ‘taliad trosiannol’ os yw’ch cyfanswm incwm budd-dal yn fwy nag yr ydych yn ei gael nawr.
Ond gan fod y budd-daliadau eraill wedi cau, pan fyddwch wedi symud i Gredyd Cynhwysol, ni allwch fynd yn ôl i'ch hen fudd-daliadau.
Cymerwch ychydig funudau i wirio pa fudd-daliadau y gallwch eu hawlio a faint y gallech ei gael bob mis gyda’n Cyfrifiannell Budd-daliadau
Nid yw’ch Credyd Cynhwysol yn talu am eich gwariant
Os nad yw’ch taliad Credyd Cynhwysol yn ddigon am eich gwariant, bydd angen i chi weithredu’n gyflym i osgoi mynd i ddyled.
Sicrhewch eich bod wedi gwneud cyllideb gyfoes o’ch holl incwm a’ch gwariant.
Cynlluniwr cyllideb
I’ch helpu i reoli’ch arian, rhowch gynnig ar ein Cynlluniwr cyllideb rhad ac am ddim sy’n hawdd ei ddefnyddio
Gwiriwch a ydych yn cael popeth y mae gennych hawl iddo - er enghraifft, prydau ysgol am ddim, cyfraddau gostyngedig am fand eang a chyfleustodau a help gyda’ch Treth Gyngor.
Lleihau eich treuliau
Os oes gennych golled incwm tymor byr, efallai y byddwch chi'n gallu lleihau eich treuliau dros dro. Er enghraifft, gyda gwyliau talu ar fenthyciadau a chardiau credyd, neu ohirio taliadau ar eich premiymau yswiriant.
Darganfyddwch fwy am yr help sydd ar gael yn ein canllaw Byw ar incwm gwasgedig
Nid yw’ch Credyd Cynhwysol yn talu am eich rhent neu’ch morgais
Rydych yn talu rhent
Os ydych chi’n talu rhent i awdurdod lleol, cyngor neu asiantaeth dai, byddwch chi’n cael help gyda’ch rhent llawn fel rhan o’ch taliad Credyd Cynhwysol.
Fodd bynnag, bydd y swm a gewch yn cael ei leihau gan:
- 14% am 1 ystafell wely sbâr
- 25% am 2 ystafell wely sbâr neu fwy.
Os ydych yn rhentu’n breifat, mae eich costau tai yn seiliedig ar y Lwfans Tai Lleol (LHA) i’ch ardal. Er enghraifft, os ydych chi'n sengl ac nad oes gennych blant dibynnol – bydd yr LHA yn seiliedig ar y gost o rentu fflat un ystafell wely yn lleol (neu o bosibl rhentu ystafell mewn llety a rennir os ydych o dan 35 oed).
Os ydych yn mynd i gael trafferth talu’ch rhent o ganlyniad i ddiffyg yn y swm rydych yn ei gael yn erbyn y swm y mae rhaid i chi ei dalu, gallwch wneud cais i’ch cyngor lleol am Daliad Tai Dewisol.
Darganfyddwch fwy am Daliadau Tai Dewisol ar yn GOV.UK.
Mae gennych forgais
Yr enw ar yr help a gewch gyda’ch morgais yw Cymorth ar gyfer Llog Morgais. Mae’n fenthyciad y bydd rhaid i chi ei dalu’n ôl pan fyddwch yn gwerthu’r eiddo.
Dim ond ar ôl i chi fod yn hawlio Credyd Cynhwysol am tri mis y gallwch gael Cymorth ar gyfer Llog Morgais ond gall pobl ar Gredyd Pensiwn ei gael heb gyfnod aros.
Darganfyddwch fwy yn ein canllaw Cymorth ar gyfer Llog Morgais (SMI)
Os ydych chi'n cael trafferth cadw i fyny â'ch ad-daliadau morgais, gallwch wneud cais i'ch darparwr morgais am wyliau talu.
Ffynonellau cymorth eraill
Dod o hyd i’ch cynllun lles lleol
Os oes angen help arnoch gyda biliau gwresogi, tanwydd neu fwyd neu os oes gennych gost frys, gallwch weld a all eich cynllun lles lleol helpu.
Yn Lloegr mae’r cynllun hwn yn cael ei redeg gan eich cyngor lleol.
Darganfyddwch eich cyngor lleol Yn agor mewn ffenestr newydd ar GOV.UK.
Os ydych chi'n byw yn Lloegr, mae rhai cynlluniau lles lleol wedi'u disodli gan y Crisis and Resilience Fund.
Gall y gronfa ddarparu arian parod mewn argyfyngau yn ogystal â’ch helpu chi gyda chyngor, cyllidebu a chefnogaeth i osgoi problemau hir dymor.
Mae gwledydd eraill yn y Deyrnas Unedig yn cynnal cynlluniau tebyg ei hunain.
Cymru
Darganfyddwch fwy am y Gronfa Cymorth Ddewisol ar wefan Llywodraeth Cymru
Lloegr
Darganfyddwch eich cynllun cymorth lles lleol ar wefan Children’s Society
Yr Alban
Darganfyddwch fwy am Gronfa Les yr Alban ar wefan Llywodraeth yr Alban
Gogledd Iwerddon
Darganfyddwch fwy am gymorth ariannol ychwanegolYn agor mewn ffenestr newydd ar wefan nidirect.
Mae Turn2us Grants SearchYn agor mewn ffenestr newydd yn rhoi rhestr o sefydliadau ac elusennau lleol a chenedlaethol a all helpu unigolion.
Ymunwch â'n grŵp Facebook
Ymunwch â'n grŵp Facebook Cyllidebu ac Arbed Arian preifat i gael awgrymiadau a chefnogaeth i arbed arian gan gymuned o gynilwyr.
Os oes angen help arnoch gyda chyllidebu personol, gofynnwch yn y Ganolfan Gwaith a byddant yn gallu dweud wrthych ble mae cefnogaeth wyneb yn wyneb ar gael.
Darganfyddwch fwy yn ein canllaw Help i reoli eich arian os ydych yn cael budd-daliadau
Os ydych yn cael trafferth talu dyledion presennol, mae’n bwysig cael cyngor gan elusen cyngor ar ddyledion ar unwaith.
Ydych chi’n cael trafferthion gyda thaliadau?
Defnyddiwch ein Teclyn Lleolwr cyngor ar ddyledion i ddod o hyd i gyngor ar ddyledion diduedd ac am ddim ar-lein, dros y ffon neu yn agos at le rydych yn byw.
