Os bydd eich cais am forgais yn cael ei wrthod, mae ffyrdd o wella eich siawns o’i gael eich gcymeradwyo y tro nesaf. Mae’n bwysig peidio â rhoi cynnig ar fenthyciwr arall gan y bydd pob cais yn ymddangos ar eich ffeil credyd.
Beth sydd yn y canllaw hwn
- Y prif resymau dros wrthod cais am forgais
- Os oes gennych gredyd gwael
- Os ydych wedi gwneud gormod o geisiadau credyd
- Os oes gennych ormod o ddyled
- Os ydych wedi defnyddio benthyciadau diwrnod cyflog
- Os oes gwall ar eich ffeil credyd
- Os nad ydych yn ennill digon
- Os nad oes gennych ddigon ar gyfer blaendal
- Os ydych chi wedi byw yn y DU am lai na thair blynedd
- Beth i’w wneud ar ôl i gais morgais fethu
Y prif resymau dros wrthod cais am forgais
Mae rhai rhesymau cyffredin dros wrthod eich cais am forgais yn cynnwys:
- eich hanes credyd
- gormod o ddyled
- eich hanes cyflogaeth
- nad ydych yn ennill digon i wneud ad-daliadau.
Gallai eich cais am forgais gael ei wrthod, hyd yn oed ar ôl i chi gael cytundeb mewn egwyddor (AIP).
Gallai defnyddio brocer morgeisi helpu os ydych wedi cael eich gwrthod
Os ydych wedi cael eich gwrthod gan ddarparwr penodol, gallai defnyddio brocer morgeisi helpu. Maen nhw’n ymgynghorwyr annibynnol sy’n gallu edrych ar amrywiaeth o forgeisi gan wahanol fenthycwyr, a gallent ddod o hyd i ddarparwr i chi a fydd yn derbyn eich cais.
Os oes gennych gredyd gwael
Bydd benthycwyr yn cynnal gwiriad credyd pan fyddwch yn gwneud cais am forgais, ac os oes gennych sgôr credyd gwael, efallai y caiff eich cais ei wrthod.
Beth i’w wneud
Gwiriwch eich ffeil credyd gydag asiantaeth gwirio credyd:
- ExperianYn agor mewn ffenestr newydd
- EquifaxYn agor mewn ffenestr newydd
- TransUnionYn agor mewn ffenestr newydd
Unwaith y byddwch yn deall eich sgôr credyd, byddwch am edrych ar wella eich statws credyd. Edrychwch ar ein canllaw Sut i wella eich sgôr credyd.
Mae cofrestru i bleidleisioYn agor mewn ffenestr newydd yn ffordd gyflym o wella eich sgôr credyd a gwneud i fbenthycwyr fod yn fwy tebygol o dderbyn eich cais am forgais.
Mae’n gyflym ac yn hawdd cofrestru ar-lein ar wefan y Comisiwn EtholiadolYn agor mewn ffenestr newydd neu drwy eich cyngor lleol
Os ydych wedi gwneud gormod o geisiadau credyd
Pan fyddwch yn gwneud cais am gredyd, bydd eich benthyciwr yn chwilio eich adroddiad credyd. Maen nhw’n perfformio naill ai:
- ‘chwiliad meddal’, na all cwmnïau eraill ei weld, felly nid yw fel arfer yn effeithio ar eich ffeil credyd, neu
- ‘chwiliad caled’, sy’n gadael marc ar eich ffeil credyd.
Beth i’w wneud
Gall gwneud cais am lawer o gredyd mewn cyfnod byr o amser wneud iddo edrych fel bod gennych broblemau ariannol.
Ceisiwch osgoi cymryd bargeinion credyd newydd o leiaf flwyddyn cyn eich bod am gael morgais.
Sut mae ceisiadau morgais yn effeithio ar gredyd?
Bydd y rhan fwyaf o fenthycwyr yn gwirio eich cymhwysedd yn gyntaf gyda chwiliad meddal. Dyma beth y ddefnyddir pan fyddant yn eich derbyn am gytundeb mewn egwyddor (AIP). Os cewch eich gwrthod ar y cam hwn, ni fydd yn effeithio ar eich statws credyd.
Bydd y benthyciwr yn cynnal chwiliad caled pan fyddwch yn gwneud eich cais ffurfiol. Gall hyn effeithio ar eich statws credyd, ond os ydych eisoes wedi pasio gwiriad cymhwyster mae’n annhebygol y cewch eich gwrthod.
Mae hyn yn golygu y gallwch wirio a yw benthycwyr yn debygol o dderbyn eich cais heb niweidio eich sgôr credyd.
Os oes gennych ormod o ddyled
Os oes gennych lawer o ddyled, bydd yn lleihau eich siawns o gael eich derbyn ar gyfer morgais.
Beth i’w wneud
Os oes gennych bryderon ariannol, mae’n werth gwneud y gorau o’r cyngor cyfrinachol am ddim sydd ar gael i chi.
Darganfyddwch fwy am y cymorth a chefnogaeth am ddim sydd ar gael yn ein canllaw Help os ydych yn cael trafferth gyda dyledion.
Os ydych wedi defnyddio benthyciadau diwrnod cyflog
Bydd unrhyw fenthyciad diwrnod cyflog a gawsoch dros y chwe blynedd diwethaf yn cael ei ddangos ar eich ffeil credyd.
Hyd yn oed os gwnaethoch dalu’ch benthyciad ar amser ac yn llawn, bydd gennych lai o siawns o gael cynnig morgais. Mae benthycwyr yn gweld benthyciadau diwrnod cyflog fel arwydd na fyddwch yn gallu ymdopi â morgais.
Beth i’w wneud
Ni fydd pob benthyciwr yn eich gwrthod os ydych wedi defnyddio benthyciadau diwrnod cyflog. Siaradwch ag ymgynghorydd morgeisi a all ddarganfod pa fargeinion allai fod ar gael i chi.
Bydd eich siawns o gael cynnig morgais yn gwella pan fydd chwe blynedd wedi mynd heibio ers i chi ddefnyddio benthyciad diwrnod cyflog ddiwethaf.
Os oes gwall ar eich ffeil credyd
Mae’n bosibl bod camgymeriad ar eich ffeil credyd. Pan fydd benthycwyr yn nodi manylion eich cais, gall fod gwallau gweinyddol weithiau.
Beth i’w wneud
Mae’n debyg na fydd eich benthyciwr yn dweud wrthych yn union pam y gwrthodwyd eich cais, ond gallwch ofyn iddynt pa asiantaeth gredyd a ddefnyddiwyd ganddynt.
Unwaith y byddwch yn gwybod hyn, gallwch ofyn i’r asiantaeth gywiro unrhyw wallau ar eich adroddiad credyd:
Os nad ydych yn ennill digon
Bydd angen i fenthycwyr weld eich bod yn ennill digon i wneud ad-daliadau, felly efallai y cewch eich gwrthod os nad ydych, neu os na allwch brofi eich bod yn ennill digon.
Beth i’w wneud
Gallai gofyn am forgais llai fod o gymorth. Gallwch weithio allan faint y gallwch chi ei fforddio trwy ddefnyddio ein Cyfrifiannell fforddiadwyedd.
Os ydych yn hunangyflogedig, bydd angen i chi sicrhau eich bod yn gallu darparu datganiadau treth a chyfrifon busnes am o leiaf y ddwy flynedd ddiwethaf. Bydd rhai benthycwyr hefyd eisiau prawf eich bod gennych waith wedi’i dwedi trefnu yn y dyfodol.
Efallai y bydd benthyciwr arall yn dal i gynnig morgais i chi
Mae meini prawf pob benthyciwr yn wahanol. Nid yw gwirio beth allwch chi fforddio ei fenthyg fel arfer yn effeithio ar eich statws credyd, felly mae’n werth chwilio o gwmpas i weld a allwch chi gael y fargen sydd ei hangen arnoch chi.
Os nad oes gennych ddigon ar gyfer blaendal
Os mai dim ond blaendal bach rydych wedi gallu cynilo, efallai y cewch eich gwrthod oherwydd eich bod yn gofyn i fenthyg gormod o arian.
Beth i’w wneud
Mae rhai bargeinion ar gael os oes gennych flaendal mor isel â 5%, ond bydd angen i chi chwilio amdanynt.
Bydd cynilo blaendal mwy yn helpu. Edrychwch ar ein canllaw Cynilo arian ar gyfer blaendal morgais.
Efallai yr hoffech hefyd edrych ar Cynlluniau’r llywodraeth ar gyfer prynwyr am y tro cyntaf a pherchnogion tai cyfredol.
Os ydych chi wedi byw yn y DU am lai na thair blynedd
Ni fydd rhai benthycwyr yn cynnig morgais i chi os ydych wedi byw yn y DU am lai na thair blynedd.
Beth i’w wneud
Mae benthycwyr a fydd yn ystyried eich cais. Gwnewch yn siŵr eich bod yn darparu eich contract cyflogaeth a fisa, sy’n profi bod gennych ganiatâd i fyw a gweithio yn y DU.
Gall siarad ag ymgynghorydd morgeisi eich helpu i ddod o hyd i fenthycwyr a fydd yn cynnig morgais i newydd-ddyfodiaid.
Beth i’w wneud ar ôl i gais morgais fethu
Gallai fod yn demtasiwn i wneud cais eto ar unwaith, ond gall gormod o geisiadau mewn cyfnod byr niweidio eich sgôr credyd.
Yn lle hynny, edrychwch yn ofalus ar y rheswm pam y gwrthodwyd eich cais. Efallai y bydd rhai datrysiadau hawdd y gallwch eu gwneud, gan gynnwys:
- cofrestru i bleidleisio
- cywiro unrhyw gamgymeriadau ar eich ffeil credyd
- gwirio ein Cyfrifiannell morgais i weld beth allwch chi ei fenthyg yn realistig.
Gall rhai mesurau eraill gymryd peth amser, ond byddant yn eich helpu yn y tymor hir:
- gwella eich sgôr credyd
- lleihau eich dyled
- cynilo blaendal mwy.
Gall siarad ag ymgynghorydd morgeisi helpu i ddeall beth allech chi ei wneud i wella eich siawns o gael cais am forgais wedi’i dderbyn.
