Beth yw tariffau?

Ar 3 Ebrill 2025, cyhoeddodd llywodraeth yr Unol Daleithiau y byddent yn cyflwyno nifer o dariffau - math o dreth sy'n cael ei ychwanegu at gost rhywbeth pan fydd yn dod i mewn o wlad arall. Mae hyn yn cynnwys tariff o 10% ar nwyddau sy'n mynd i'r Unol Daleithiau o'r DU.

Mae'r sefyllfa hon yn newid cryn dipyn, ond ar hyn o bryd bydd popeth a gaiff ei fewnforio i'r Unol Daleithiau yn wynebu tariff o leiaf 10%. Bydd rhai gwledydd yn wynebu cyfraddau uwch, ond mae'r rhan fwyaf o'r rhain wedi cael eu hoedi am 90 diwrnod. Bydd gan rai cynhyrchion penodol dariffau uwch hefyd, gan gynnwys tariff o 25% ar geir sydd wedi'u mewnforio. Nid yw'r DU wedi cyhoeddi unrhyw dariffau ar fewnforion o'r Unol Daleithiau.

Oherwydd bod tariffau yn ychwanegu cost ychwanegol ar fewnforio nwyddau i'r Unol Daleithiau - un o'r marchnadoedd byd-eang pwysicaf - mae'r cyhoeddiad hwn wedi cael effaith fawr ar economi'r byd, gan fod angen ystyried y 'dreth' newydd hon.

Mae tariff yn fath o dreth sy'n cael ei ychwanegu at gost rhywbeth pan gaiff ei fewnforio o wlad arall. Fel arfer mae'n cael ei gyfrifo fel canran, sy'n golygu bod cost ychwanegol yn cael ei ychwanegu gan ddibynnu ar werth cynnyrch.

Enghraifft o sut y gallai hyn weithio ar gyfer y tariffau a gyhoeddwyd yw:

• mae cwmni yn mewnforio car o'r DU i'r Unol Daleithiau

• cost sylfaenol y car (sef ei bris manwerthu minws trethi ac ymylon) yw £10,000 

• bydd yn rhaid i'r cwmni sy'n mewnforio'r car dalu'r tariff o 25% – yn yr achos hwn, mae hynny'n £2,500

• mae'r gost tariff yn cael ei gasglu gan lywodraeth yr Unol Daleithiau.

Efallai y bydd y cwmni sy'n gwerthu'r car yn yr Unol Daleithiau yn penderfynu amsugno'r gost ychwanegol neu godi mwy ar eu cwsmeriaid am y cynnyrch.

Gall cyflwyno tariffau effeithio ar yr economi mewn amrywiaeth o wahanol ffyrdd, gan gynnwys twf, chwyddiant a chyflogaeth. Nid yw bob amser yn hawdd rhagweld yr union effaith.

Gall tariffau yn gyffredinol wneud mewnforio cynhyrchion o wledydd eraill yn ddrytach. Oherwydd bod llawer o sectorau yn dibynnu ar fewnforio nwyddau o bob cwr o'r byd, gall tariffau gynyddu eu costau, sy'n aml yn golygu y byddant yn codi prisiau uwch ar eu cwsmeriaid.

O ganlyniad, gallai cwmnïau sy'n dibynnu ar fasnach ryngwladol weld eu busnes yn arafu neu'n stopio'n gyfan gwbl tra bod eu costau rhedeg a'u prisiau yn uwch.

Mae'n anodd iawn rhagweld union effaith tariffau ar y farchnad stoc, ond mae unrhyw fath o ansicrwydd yn tueddu i wneud i brisiau cyfranddaliadau ostwng. Rydym eisoes wedi gweld rhai symudiadau yn y farchnad sydd wedi effeithio ar y rhai sydd â buddsoddiadau, gan gynnwys pensiynau.

Mae prisiau bondiau hefyd wedi gostwng a all effeithio ar y rhai sy'n agosach at ymddeol gyda threfniant 'ffordd o fyw' ar eu pensiwn. Gall hyn olygu bod gwerth eich cronfa bensiwn wedi newid yn eithaf sydyn.

Gallwch ddysgu mwy am sut mae pensiynau wedi cael eu heffeithio yn ein blog Pam mae fy mhot pensiwn wedi gostwng mewn gwerth.

Mae'r effaith tymor hwy yn dibynnu ar sut mae gwledydd yn addasu i reolau newydd a sut maen nhw'n ymateb, ond mae unrhyw beth sy'n cyfyngu cwmnïau rhag masnachu'n rhydd yn tueddu i gael effaith negyddol ar werthoedd stoc. 

Nid yw'n glir sut y gallai tariffau effeithio ar chwyddiant. Mae Banc Lloegr yn anelu at gadw chwyddiant ar 2%, ond os bydd tariffau yn arwain at brisiau uwch ar draws ystod o gynhyrchion, gallai hyn ddechrau codi.

Gallwch ddysgu mwy am sut y gallai hyn effeithio arnoch chi yn ein canllaw Chwyddiant – beth mae'n ei olygu i'ch cynilion?

Er bod tariffau yn cael eu talu gan gwmnïau sy'n mewnforio nwyddau, gall defnyddwyr ar ddwy ochr y fasnach deimlo'r effeithiau o hyd.

Os yw cwmni yn masnachu llai oherwydd tariffau, gall arwain at gostau rhedeg uwch. Gellid trosglwyddo hyn i'r cwsmer gyda phrisiau uwch ar gyfer eu cynhyrchion a'u gwasanaethau.

Mae hefyd yn bosibl y gallai gwlad sydd wedi cael tariffau wedi'u gosod arni ymateb trwy wneud yr un peth, a allai gynyddu costau nwyddau - ond nid oes sicrwydd y bydd hyn yn digwydd.

Gyda chymaint o ansicrwydd, byddwch chi eisiau gwybod beth sy'n mynd i ddigwydd i'ch sefyllfa ariannol. Dyma beth allai newid.

Os ydych chi'n cynilo mewn pensiwn cyfraniadau wedi’u diffinio (DC), byddwch yn casglu pot o arian y gellir ei fuddsoddi wedyn mewn amrywiaeth o ffyrdd. Nid yw'r rhan fwyaf o bobl yn gwneud y penderfyniadau buddsoddi hyn eu hunain.

Oherwydd y sefyllfa gyda'r marchnadoedd, efallai y bydd rhai pobl yn gweld bod gwerth eu pot pensiwn wedi newid. Mae gennym fwy o wybodaeth am yr hyn y gallwch ei wneud yn ein blog Pam mae fy mhot pensiwn wedi gostwng mewn gwerth?

Mae llawer yn disgwyl i gyfraddau llog ostwng, a gallai hyn gael ei gyflymu gan dariffau. Mae rhai benthycwyr morgeisi eisoes wedi dechrau torri cyfraddau morgais i baratoi ar gyfer hyn.

Os ydych chi'n edrych i gymryd morgais newydd neu newid i fargen newydd, neu os ydych chi ar forgais cyfradd amrywiol, gall eich ad-daliadau misol fod yn is o ganlyniad i'r gyfradd llog is.

Fodd bynnag, mae llawer o gyfrifon cynilo yn talu llog yn seiliedig ar y gyfradd llog gyfredol. Felly efallai y byddwch chi'n gweld y bydd unrhyw gynilion sydd gennych yn tyfu'n arafach.

Mae'n anoddach rhagweld beth fydd yn digwydd yn y tymor hwy. Os bydd tariffau yn cyflymu chwyddiant, gallai olygu nad yw cyfraddau llog yn gostwng, neu'n gostwng yn arafach na'r disgwyl. 

Dysgwch fwy yn ein canllaw Esbonio cyfraddau llog.

Gyda masnachu ryngwladol yn dod yn fwy costus, gellid trosglwyddo rhywfaint o effaith economi arafach i'r cwsmer. Gallai hyn olygu eich bod chi'n talu mwy am eitemau a gwasanaethau bob dydd, yn ogystal ag am bryniannau mwy arwyddocaol fel car neu ffôn symudol.

Nid yw'n sicr y bydd hyn yn digwydd, a gallai gymryd amser cyn i ni weld effeithiau tariffau ar bris ein basgedi siopa. Mae hefyd yn bosibl y bydd gwledydd eraill yn ceisio masnachu mwy gyda'r DU er mwyn osgoi masnachu drutach mewn mannau eraill, gan arwain at brisiau is - ond mae'n anodd iawn rhagweld hynny.

Mae nawr yn amser da i adolygu eich cyllid a pharatoi ar gyfer y newidiadau posibl i'r darlun economaidd.

Mae ein Cynlluniwr cyllideb yn lle da i ddechrau. Mae creu cyllideb yn eich helpu i gadw golwg ar eich arian, er mwyn i chi wybod pryd y gallwch wario a sut i osgoi mynd i'r coch.

Os oes gennych ddyledion, mae'n bwysig gweithio ar gael y rhain o dan reolaeth. Mae gennym nifer o ganllawiau ar Ddelio â dyled sy'n esbonio'r gwahanol ffyrdd y gallwch chi ad-dalu eich dyledion, er mwyn i chi ddeall mwy am y daith tuag at fod yn ddi-ddyled.

Gallech fod â hawl i fudd-daliadau nad oeddech chi'n gwybod amdanynt. Ni chaiff tua £23 biliwn y flwyddyn ei hawlio gan bobl sy'n colli allan, felly gwiriwch a allech chi fod yn hawlio mwy.

Mae ein Cyfrifiannell budd-daliadau yn caniatáu i chi ddarganfod yn gyflym beth y gallech fod â hawl iddo.

Gall llawer o aelwydydd arbed cannoedd o bunnoedd y flwyddyn trwy wneud rhai newidiadau i'w biliau cartref, felly mae'n werth gwirio. Mae ein canllaw Sut i arbed arian ar filiau cartref yn esbonio beth allwch chi ei wneud i arbed mwy.

Mae Pension Wise yn wasanaeth gan HelpwrArian gaiff ei gefnogi gan y llywodraeth. Rydym yn cynnig arweiniad diduedd am ddim i bobl dros 50 oed. Gallwn helpu trwy esbonio'ch opsiynau ac esbonio sut maen nhw'n gweithio.

Dysgwch fwy am Pension Wise ac i drefnu apwyntiad.

Mae gennym nifer o ganllawiau ar Help gyda chostau byw, gan gynnwys gwybodaeth ar sut i gael cymorth ariannol brys a sut i flaenoriaethu eich biliau.