Mae disgwyl babi yn gyffrous, ond gall hefyd fod yn amser drud. Dilynwch y camau hyn i sicrhau eich bod wedi paratoi ar gyfer eich dyfodiad newydd.
Cam 1 – pwyso a mesur eich arian
Awgrym da
Gallwch osgoi gwastraffu arian trwy ofyn i famau eraill pa eitemau babanod yr oedd eu hangen arnynt a'u defnyddio mewn gwirionedd, a beth nad oes angen i chi ei brynu ar unwaith.
Nid yw byth yn rhy gynnar i weithio allan eich cyllideb. Peidiwch â'i ohirio tan ar ôl i'r babi gael ei eni.
Os ydych yn gwybod yn union beth sy'n dod i mewn ac yn mynd allan bob mis, gall eich helpu i gyfrifo beth allwch ei fforddio.
Cynlluniwr cyllideb
I’ch helpu i reoli’ch arian, rhowch gynnig ar ein Cynlluniwr cyllideb rhad ac am ddim sy'n hawdd ei ddefnyddio.
Bydd gwneud rhestr o'r hyn sydd ei angen arnoch a darganfod faint mae popeth yn ei gostio yn eich helpu i baratoi ar gyfer eich dyfodiad newydd ac osgoi unrhyw gostau annisgwyl.
Cyfrifiannell Costau Babi
Cyfrifwch beth fydd ei angen ar eich babi a faint y bydd yn ei gostio.
Cam 2 – adolygu cyllid ar y cyd
Mae rhannu cyfrifoldebau, fel babi newydd, yn golygu efallai y bydd rhaid i chi newid y ffordd rydych yn delio â phenderfyniadau ar y cyd ynghylch cyllidebu cartref. Ac os yw un ohonoch yn bwriadu cymryd amser i ffwrdd i ofalu am y babi, mae'n syniad da meddwl sut gallai incwm is effeithio ar eich dewisiadau. Mae'n bwysig:
- siarad yn blaen am arian – peidiwch â chadw unrhyw gyfrinachau ariannol ac ni fydd unrhyw bethau annisgwyl
- gosod rhai rheolau sylfaenol – cytuno i beidio â phrynu unrhyw beth dros derfyn penodol, dywedwch £50, heb ei drafod â’ch gilydd yn gyntaf
- gwneud amser – mae cyllidebu cartrefi yn bwysig, felly neilltuwch amser rheolaidd i drafod a chytuno ar faterion ariannol.
Darganfyddwch fwy am siarad am arian gyda'ch partner yn ein canllaw A ddylech reoli arian ar y cyd neu ar wahân
Cam 3 – cwtogi’ch treuliau
Awgrym da
Talwch eich biliau cyfleustodau yn awtomatig gan ddefnyddio Debyd Uniongyrchol a rheolau sefydlog gan y byddwch yn aml yn cael gostyngiad am wneud hynny gan eich darparwr.
Os yw'ch incwm yn debygol o newid (er enghraifft, os byddwch yn stopio gweithio), efallai y bydd angen i chi edrych ar gwtogi'ch gwariant. Man cychwyn da yw rhannu eich treuliau yn eitemau sy’n hanfodol ac eitemau nad ydynt yn hanfodol.
Yn gyntaf, edrychwch a allwch arbed ar hanfodion fel biliau cartrefi a nwyddau bwyd trwy ddefnyddio gwefannau cymharu. Nesaf, edrychwch ar bethau nad ydynt yn hanfodol, a oes pethau y gallech eu gwneud hebddynt, fel aelodaeth campfa neu danysgrifiadau teledu?
Cam 4 – lleihau’ch dyledion
Awgrym da
Os na allwch dalu'ch holl ddyledion ar unwaith, talwch y biliau a thaliadau pwysicaf yn gyntaf.
Mae'n bwysig peidio ag anwybyddu dyledion neu ddim ond cadw at dalu'r isafswm bob mis.
Os cymerwch amser i ddelio â dyledion nawr, bydd yn arbed arian i chi yn y tymor hir.
Darganfyddwch fwy yn ein canllaw Sut i flaenoriaethu’ch dyledion
Cam 5 – agor cyfrif cynilo
Gorau po gyntaf i chi ddechrau rhoi arian o'r neilltu. Tra gallwch, cronnwch eich cynilion i dalu costau hanfodol y babi a'ch gweld trwy unrhyw gyfnod o incwm is.
Efallai y byddai'n well i chi fynd am gyfrif mynediad hawdd y gallwch dipio iddo os bydd angen, yn hytrach nag un a fydd yn cloi eich arian i ffwrdd.
Ond os ydych yn meddwl y cewch eich temtio i wario'ch cynilion, gwnewch hi'n anos cael gafael ar arian parod.
Er enghraifft, ceisiwch ddewis cyfrif cynilo â banc gwahanol, felly mae'n llai hawdd symud arian i'ch cyfrif cyfredol.
Darganfyddwch fwy yn ein canllaw Cyfrifon banc i gadw a chynilo'ch arian
Ymunwch â’n grŵp Facebook
Ymunwch â'n grŵp preifat i gael awgrymiadau a chefnogaeth arbed arian gan gymuned o gynilwyr.
Cam 6 – rhoi hwb i’ch incwm
Gwnewch gais am eich holl hawliau
Mae beth gallwch wneud cais amdano yn dibynnu ar ble rydych yn byw a'ch amgylchiadau personol.
Gallech fod â hawl i fudd-daliadau a help arall tuag at gost magu teulu, fel Credyd Cynhwysol a Budd-dal Plant.
Darganfyddwch fwy yn ein canllawiau:
Pa fudd-daliadau gallaf wneud cais amdanynt pan fyddaf yn feichiog neu wedi cael babi?
Help gyda chostau byw
Cymerwch ychydig funudau i wirio pa fudd-daliadau y gallwch eu hawlio a faint y gallech ei gael bob mis gyda’n Cyfrifiannell Budd-daliadau
Gallwch hefyd chwilio am fudd-daliadau a grantiau gan ddefnyddio'r gyfrifiannell budd-daliadau ar wefan Turn2us.
Darganfyddwch fwy yn ein canllaw Sut i flaenoriaethu’ch dyledion
Syniadau eraill i wneud arian
Mae ffyrdd eraill o hybu'ch incwm, fel gwneud rhywfaint o waith gartref.
Gallech hefyd feddwl am godi arian trwy werthu eiddo diangen neu ailgylchu hen ffonau symudol neu liniaduron.
Mae dwsinau o syniadau gwneud arian i'ch helpu chi i ddechrau ar wefan Money Saving Expert
Cadwch olwg ar ddyddiadau pwysig
Mae gennych lawer o bethau i'w gwneud, a dyddiadau i'w cofio, pan rydych yn disgwyl babi.
Defnyddiwch ein Llinell Amser Arian Babi
Mae'n rhoi rhestr bersonol lawn i chi o'r holl ddyddiadau cysylltiedig ag arian sy'n ymwneud â'ch beichiogrwydd a'ch babi newydd. Gall hefyd eich helpu i gyllidebu ar gyfer treuliau, pryd i ofyn am absenoldeb rhiant, a dweud wrthych pryd y gallwch hawlio rhai budd-daliadau a grantiau.
Defnyddiwch ein Llinell Amser Arian Babi.
