Mae undeb credyd yn darparu benthyciadau, cynilion, cyfrifon banc a gwasanaethau eraill i'w haelodau. Maent wedi'u cynllunio i helpu'r gymuned yn hytrach na gwneud arian, gan yn aml dderbyn pobl sydd wedi cael eu gwrthod am gyfrifon a benthyciadau mewn mannau eraill.
Beth yw undeb credyd?
Mae undeb credyd yn ddarparwr ariannol nid-er-elw sy'n helpu pobl i gael mynediad at gynhyrchion bancio fel cyfrifon banc, cynilion a benthyciadau.
Fel arfer, maent yn:
- cael eu rhedeg gan aelodau i fod o fudd i gymunedau, yn hytrach na gwneud elw
- gallu helpu'r rhai a wrthodwyd gan ddarparwyr eraill.
Bydd angen i chi ddod yn aelod, sydd fel arfer yn golygu gofyn i chi dalu ffi fach (er enghraifft, £2) neu gynilo swm penodol (fel £10).
Pwy all ymuno ag undeb credyd?
Mae undebau credyd yn gweithio drwy i bob aelod rannu 'cwlwm cyffredin'. Er enghraifft, efallai y byddwch yn:
- byw, gweithio, astudio neu wirfoddoli mewn ardal benodol
- gweithio yn yr un diwydiant neu i gyflogwyr penodol
- perthyn i'r un undeb llafur.
Pa ID fyddaf ei angen?
Fel arfer, bydd angen i chi ddarparu dwy ddogfen ddiweddar i brofi pwy ydych chi a'ch cyfeiriad. Er enghraifft:
- pasport
- trwydded yrru
- cerdyn ID myfyrwiwr neu waith
- pas bws
- tystysgrif geni
- cyfriflen banc neu fil ynni.
Mae'r rhan fwyaf o undebau credyd yn rhestru'r dogfennau y byddant yn eu derbyn ar-lein. Os oes amheuaeth, cysylltwch â nhw i wirio.
Cyfrifon undeb credyd y gallwch eu cael
Mae'r rhan fwyaf o undebau credyd yn cynnig:
- Cyfrifon cynilo – mae'r rhain naill ai'n talu llog neu gyfran o unrhyw elw. Gallwch ddod o hyd i fwy o wybodaeth am y rhain yn cyfrifon cynilo undebau credyd.
- Benthyciadau – mae cyfraddau llog yn cael eu capio, ond efallai y bydd angen i chi gael swm penodol wedi'i gynilo gyda'r undeb credyd cyn y gallwch wneud cais. Gweler benthyca gan undeb credyd am fwy o help.
Ond bydd rhai hefyd yn cynnig yswiriant, cardiau rhagdaledig, morgeisi a chyfrifon cyfredol.
Cyfrifon banc undeb credyd
Mae hyn yn gweithio fel cyfrif cyfredol gan fanc neu gymdeithas adeiladu, ond fel arfer mae ganddo ffioedd am rai nodweddion.
Am ddim, gallwch fel arfer:
- dalu i mewn neu dynnu arian parod allan yn yr undeb credyd
- cael arian wedi ei dalu i mewn, fel cyflogau, budd-daliadau a phensiynau
- defnyddio bancio ar-lein, symudol neu ffôn
- cael cyngor a chefnogaeth ariannol.
Yn aml, bydd angen i chi dalu ffi cyfrif misol ar gyfer:
- cerdyn debyd ar gyfer gwario neu ddefnyddio peiriannau arian parod
- sefydlu taliadau rheolaidd, fel biliau drwy Ddebyd Uniongyrchol
- mynediad i fenthyca arian gan ddefnyddio gorddrafft – fel arfer gyda llog dyddiol hyd at 42.6%.
Efallai y codir tâl arnoch bob tro y byddwch yn defnyddio peiriant arian parod i dynnu arian allan neu i weld eich balans, felly gwiriwch bob amser. Bydd rhai cyfrifon hefyd yn ei gwneud yn ofynnol i chi dalu isafswm i mewn bob mis, fel £80.
Fel arfer, ni fydd yn rhaid i chi basio gwiriad credyd, hyd yn oed os byddwch yn gwneud cais am orddrafft Mae undebau credyd fel arfer yn defnyddio gwiriadau â llaw i benderfynu a ddylid rhoi benthyg i chi ai peidio.
Cyfrifon banc eraill i'w hystyried
Cyn agor cyfrif undeb credyd, mae opsiynau eraill a allai fod yn rhatach:
- cyfrif cyfredol banc neu gymdeithas adeiladu – fel arfer y man galw cyntaf i'r rhan fwyaf roi cynnig arni
- cyfrif banc sylfaenol – mae hyn yn cynnig y rhan fwyaf o'r un nodweddion â chyfrif cyfredol nodweddiadol (ac eithrio gorddrafft) a bydd y rhan fwyaf o bobl yn cael eu derbyn felly gallai fod yn addas ar gyfer y rhai sydd â hanes credyd gwael, euogfarnau neu bobl yn y carchar
- cyfrif cerdyn rhagdaledig – gallwch ddefnyddio hwn i wario a thynnu arian parod allan, ond fel arfer ni allwch sefydlu taliadau fel Debydau Uniongyrchol neu dderbyn eich cyflog neu fudd-daliadau i mewn iddo.
Mae ein teclyn cymharu cyfrifon banc yn gadael i chi weld nodweddion, ffioedd a chostau cyfrif. Neu mae gennym gymorth cam wrth gam ar sut i ddewis cyfrif banc.
Mae eich arian yn cael ei ddiogelu os bydd undeb credyd yn mynd i'r wal
Yn union fel y rhan fwyaf o fanciau, mae hyd at £85,000 y person wedi'i ddiogelu mewn cyfrif undeb credyd. Darganfyddwch sut mae'r Cynllun Iawndal Gwasanaethau Ariannol (FSCS) yn gweithio.
Ydych chi wedi methu taliad?
Defnyddiwch ein Teclyn Lleolwr cyngor ar ddyledion i ddod o hyd i gyngor ar ddyledion diduedd ac am ddim ar-lein, dros y ffon neu yn agos at le rydych yn byw.
Sut i ddod o hyd i undeb credyd
I chwilio am un y gallwch ymuno â hi, defnyddiwch y canlynol:
- Yng Nghymru, Lloegr a'r Alban:
- Yng Ngogledd Iwerddon:
Sut i gwyno am gyfrif undeb credyd
Os oes gennych broblem gydag undeb credyd, dilynwch y camau hyn:
- Cysylltwch â gwasanaethau cwsmeriaid. Rhowch wybod iddynt:
- pam rydych chi'n anhapus
- beth ddylen nhw ei wneud i gywiro pethau. Os nad ydych yn gallu cytuno:
- Gofynnwch am wneud cwyn ffurfiol. Mae ganddynt wyth wythnos i ymchwilio a rhoi eu hymateb terfynol i chi. Os ydych yn anhapus â hyn, neu os yw'r amserlen wedi mynd heibio, gallwch:
- Fynd â'ch cwyn i'r Gwasanaeth Ombwdsmon Ariannol (FOS) am ddim. Byddwch yn cael penderfyniad annibynnol ynghylch a oedd ymateb y cwmni yn deg neu a oes angen iddynt wneud mwy.
Am fwy o wybodaeth, gweler ein canllaw llawn ar sut i gwyno.
