Cyfraniadau pensiwn gweithle – faint mae’n rhaid i chi a’ch cyflogwr ei dalu i mewn

Rhowch eich manylion i mewn i’n Cyfrifiannell cyfraniadau pensiwn gweithle i weld faint fyddwch chi a’ch cyflogwr yn ei dalu i mewn i’ch pensiwn fel arfer.

Yr isafswm y mae’n rhaid i chi a’ch cyflogwr ei gyfrannu at eich pensiwn gweithle fel arfer yw 8%, ar yr amod:

• bod eich cyflogwr wedi sefydlu’ch pensiwn yn awtomatig neu
• gwnaethoch ofyn i ymuno â’r cynllun a bod eich enillion dros £6,240 y flwyddyn, £520 y mis neu £120 yr wythnos.

Mae’r isafswm cyfraniad o 8% fel arfer yn cynnwys:

• 5% o’ch cyflog:
  • 4% oddi wrthych
  • 1% gan y llywodraeth mewn rhyddhad treth
• 3% ar ben gan eich cyflogwr.

Efallai y byddwch yn gallu talu llai na 5% os bydd eich cyflogwr yn cyfrannu mwy.

Ar ôl i’ch pensiwn gweithle gael ei sefydlu, rhaid i’ch cyflogwr gyfrannu os ydych yn ennill dros £6,240 y flwyddyn, £520 y mis neu £120 yr wythnos.

Rhaid i gyfraniadau cyflogwr fod o leiaf 3% o’ch cyflog, ond gallant ddewis talu mwy i mewn. Efallai y bydd rhai cyflogwyr hyd yn oed yn cyfateb eich cyfraniadau hyd at derfyn penodol.

Os ydych yn ennill llai na £6,240 y flwyddyn, gall eich cyflogwr ddewis a ydynt am gyfrannu.

Mae cyfraniadau pensiwn fel arfer yn cael eu cyfrifo fel canran o gyfanswm eich enillion rhwng £6,240 a £50,270. Gelwir hyn yn ‘enillion cymwys’.

Ond efallai y bydd eich cynllun yn defnyddio cyfrifiad gwahanol yn seiliedig ar ‘enillion pensiynadwy’ yn lle. Yn aml, dyma’ch cyflog sylfaenol heb bethau fel comisiwn, bonysau a goramser.

Gallwch ofyn i’ch cyflogwr pa reolau sy’n berthnasol i chi.

Gall cynyddu’r swm rydych chi’n ei dalu i’ch pensiwn roi hwb i’ch cynilion ymddeoliad.

Gallwch ddefnyddio ein Cyfrifiannell Pensiwn i weld:

• faint o incwm rydych yn debygol o fod ei angen pan fyddwch yn ymddeol
• yr incwm yr ydych ar y trywydd i’w gael gyda’ch cyfraniadau presennol
• faint yn ychwanegol y gallech ei gael drwy newid eich cyfraniadau.