Os ydych wedi cael eich gwrthod am gredyd, fel gorddrafft, mae’n bwysig darganfod pam, oherwydd efallai y gallwch wneud rhai newidiadau. Darganfyddwch sut i wella’ch sefyllfa ariannol, o gynllunio cyllideb i wella’ch cyfle o fenthyca.
Defnyddiwch ein teclyn i gael cynllun gweithredu
Mae ein teclyn Beth i’w wneud os ydych wedi cael gwrthod credyd yn rhoi cynllun gweithredu i chi i wella eich cyfle o gael eich derbyn yn y dyfodol. Mae’n cymryd dwy funud i’w gwblhau.
Fel arall, bydd y camau isod yn eich arwain trwy beth i’w wneud.
Darganfyddwch pam gwrthodwyd credyd i chi
Mae’n debyg na fydd benthycwyr yn dweud wrthych pam gwrthodwyd credyd i chi. Er nad oes rhaid iddynt roi rheswm i chi, dylent ddweud wrthych pa asiantaeth gwirio credyd a ddefnyddiwyd ganddynt i asesu eich cais. Yna gallwch ofyn iddynt am gopi o’ch adroddiad credyd am ddim.
Mae llawer o resymau pam y gallai eich cais fod wedi cael ei wrthod. Mae’r rhain yn cynnwys:
- Hanes taliadau a fethwyd neu weithgaredd twyllodrus posibl ar eich ffeil
- y benthyciwr yn penderfynu na fyddech yn gallu ad-dalu
- peidio â bodloni telerau ac amodau penodol darparwr, fel isafswm lefel incwm, neu gamgymeriad ar eich adroddiad credyd – fel teipo yn eich cyfeiriad neu fanylion eraill.
Beth i’w wneud os gwrthodwyd credyd i chi
Mae’r camau nesaf yn dibynnu ar y rhesymau pam y cawsoch eich gwrthod.
Problemau gyda’ch ffeil credyd
Gallai gwella eich sgôr credyd gynyddu eich cyfle o allu benthyg yn y dyfodol. Gallwch hefyd ddatrys unrhyw gamgymeriadau a welwch ar eich adroddiad credyd. Darganfyddwch fwy yn ein canllaw Sut i wella eich sgôr credyd.
Methu pasio gwiriadau fforddiadwyedd
Gallai cael eich gwrthod am gredyd fod yn gyfle da i chi feddwl am eich sefyllfa arian bresennol a ffyrdd o fyw ar gyllideb. Bydd hyn yn eich helpu i gael eich cyllid yn ôl ar y trywydd iawn ar gyfer pan fyddwch yn gwneud cais am gredyd nesaf.
Os ydych yn ceisio benthyg i dalu biliau neu gostau byw eraill, gwiriwch a allwch leihau neu gwtogi ar y costau hyn. Er enghraifft, meddyliwch sut y gallech geisio lleihau maint eich gorddrafft neu gynyddu eich ad-daliadau cerdyn credyd er mwyn osgoi talu cymaint o log. Efallai y byddwch hefyd yn gallu newid i gytundeb gwell gyda darparwr arall.
Os ydych yn wynebu costau byw uwch, darganfyddwch am ffynonellau ychwanegol o incwm a chymorth yn ein hadran Help gyda chostau byw.
Taliadau a fethwyd yn ddiweddar
Os ydych wedi methu taliadau ar wariant hanfodol (fel rhent, morgais, Treth Cyngor, biliau ynni neu ddŵr), cardiau credyd neu fenthyciadau, cysylltwch â gwasanaeth cyngor ar ddyledion am ddim cyn gynted ag y gallwch. Byddant yn eich helpu i gyfrifo pa ddyledion y dylech eu had-dalu yn gyntaf i’ch atal rhag mynd i drafferthion ariannol.
Mae gan Experian fwy o ganllawiau ar beth i'w wneud nesaf ar ôl cael eich gwrthod am gredydYn agor mewn ffenestr newydd
Ydych chi wedi methu taliad?
Defnyddiwch ein Teclyn Lleolwr cyngor ar ddyledion i ddod o hyd i gyngor ar ddyledion diduedd ac am ddim ar-lein, dros y ffon neu yn agos at le rydych yn byw.
Os ydych wedi dioddef twyll credyd
Pan fyddwch chi’n gwirio’ch adroddiad credyd, edrychwch am Hysbysiad Dioddefwr Dynwarediad CifasYn agor mewn ffenestr newydd Mae nodyn Cifas yn rhybuddio benthycwyr eich bod wedi, neu yn agored i, ddioddef twyll. Bydd y nodyn yn aros ar eich ffeil am 13 mis.
Nid yw hyn yn effeithio ar eich sgôr credyd ac ni ddylai eich atal rhag cymryd credyd, ond gallai achosi problemau neu oedi os ydych yn gwneud cais am gredyd sy’n cael ei brosesu’n awtomatig fel Prynu Nawr Talu Wedyn. Mae hyn oherwydd y byddai’n rhaid i fenthyciwr gynnal ‘adolygiad â llaw’ o’ch ffeil i ddeall pam mae’r nodyn wedi’i ychwanegu.
Os hoffech i fenthycwyr wneud gwiriadau ychwanegol bob tro y byddwch yn gwneud cais am gredyd, gallwch dalu am Gofrestriad Diogelu CifasYn agor mewn ffenestr newydd
Byddwch yn ofalus cyn gwneud cais eto
Beth bynnag yw eich rheswm dros fenthyca, mae’n bwysig meddwl yn ofalus cyn gwneud cais eto. Mae hyn oherwydd bod y rhan fwyaf o geisiadau credyd yn ymddangos ar eich adroddiad credyd.
Gallai nifer o geisiadau a wrthodwyd mewn cyfnod byr niweidio’ch sgôr credyd hyd yn oed yn fwy. Mae hyn yn debygol o’i gwneud hi’n anoddach benthyca ac effeithio ar y cyfraddau llog a godir arnoch os ydych yn cael credyd.
Cymharu eich holl opsiynau benthyg
Our Eich opsiynau am fenthyca arian tool shows you the range of credit options available, based on your needs.
Mae hyn yn cynnwys ffyrdd i fenthyg a all derbyn mwy o bobl, fel undebau credyd a chynlluniau taliad cyflog ymlaen llaw cyflogwr.
Defnyddiwch gyfrifianellau cymhwysedd i wirio a fyddwch yn cael eich derbyn
Cyn gwneud cais am gredyd, defnyddiwch gyfrifianellau cymhwysedd i wirio pa mor debygol ydych chi o gael eich derbyn.
Mae llawer o fenthycwyr a gwefannau cymharu yn defnyddio'r rhain, gan gynnwys:
- MoneySavingExpertYn agor mewn ffenestr newydd
- Credit KarmaYn agor mewn ffenestr newydd
- ClearScoreYn agor mewn ffenestr newydd
Os na allwch ddod o hyd i un ar gyfer y cynnyrch yr ydych ar ei ôl, gwiriwch ddwywaith bob amser eich bod o leiaf yn bodloni isafswm y meini prawf cymhwysedd (fel isafswm incwm).
Byddwch yn wyliadwrus o fenthycwyr arian didrwydded
Mae benthycwyr arian didrwydded yn targedu pobl sy’n ei chael hi’n anodd benthyg arian gan fenthycwyr sy’n cael eu rheoleiddio. Darganfyddwch pam ei bod yn bwysig osgoi’r math hwn o fenthyca anghyfreithlon yn ein canllaw benthycwyr arian didrwydded a sut i’w hadnabod.
Sut i ddelio â phroblemau ariannol pan fydd gennych iechyd meddwl gwael
Gall iechyd meddwl gwael effeithio ar y ffordd rydych chi’n delio ag arian, a gall teimlo’n isel ei gwneud hi’n anoddach delio â phroblemau ariannol. Ond byddwch yn ymwybodol bod sawl ffordd o gael help - gyda’ch sefyllfa ariannol a’ch iechyd meddwl.
Darganfyddwch fwy yn ein canllaw Problemau ariannol a lles meddyliol.
