Rheolwch eich arian, gydag ap CThEF

Oes gennych chi dasgau sy'n gysylltiedig ag arian ar eich rhestr i'w gwneud nad ydych chi byth yn llwyddo eu cwblhau? Efallai y bydd angen i chi ddarganfod mwy o wybodaeth i fynd i'r afael â nhw, neu eich bod yn poeni y byddant yn cymryd mwy o amser nag y gallwch ei sbario ar hyn o bryd.

Os yw hyn yn swnio fel chi, rydych chi mewn cwmni da. Gofynnwch i ffrindiau neu aelodau o'r teulu ac mae'n debyg y gwelwch fod gan y rhan fwyaf o bobl un neu ddau o'r tasgau hyn. Beth bynnag sy'n digwydd mewn bywyd, gallai ap CThEF eich helpu i deimlo bod gennych fwy o reolaeth.

Mae'n Wythnos Siarad Arian, ac rydym yn annog pawb i fod yn agored a dechrau sgyrsiau am arian. Unwaith eto, rydym yn annog pawb i 'Wneud Un Peth' yn ystod Wythnos Siarad Arian i helpu i wella eich lles ariannol.

Felly, os nad ydych wedi lawrlwytho ap CThEF eto, beth am wneud hynny fel eich un peth? Mae'n hawdd i'w gosod a dechrau arni, ac yn hollol am ddim.

Beth bynnag fo'ch oedran, sefyllfa gwaith neu gyfnod bywyd, mae gan y rhan fwyaf ohonom dasg ar eu rhestr i'w gwneud sy'n cynnwys CThEF. P'un a yw'n atgoffa'ch hun beth yw eich rhif Yswiriant Gwladol ar gyfer swydd newydd, diweddaru eich cyfeiriad pan fyddwch yn symud tŷ, neu'n hawlio Budd-dal Plant pan fyddwch yn croesawu babi newydd.

Gall ap CThEF ei gwneud hi'n haws i chi gwblhau'r tasgau hyn ar unrhyw adeg, neu unrhyw le fel y gallwch eu ticio oddi ar eich rhestr ac osgoi poeni amdanynt. Ar ôl i chi ei lawrlwytho a mewngofnodi, bydd gennych fynediad hawdd at bob math o wybodaeth ddefnyddiol am arian, eich trethi a'ch budd-daliadau.

Ar hyn o bryd mae CThEF yn derbyn dros 38 miliwn o alwadau i'w linellau ffôn bob blwyddyn - llawer ohonynt yn bobl yn gofyn am wybodaeth y gallent fod wedi'i chanfod o ap CThEF neu wasanaethau ar-lein CThEF. Felly, os oes angen i chi wirio rhywbeth, mae'n gwneud synnwyr i roi cynnig ar yr app yn gyntaf.

Ar ôl i chi lawrlwytho ap CThEF a mewngofnodi, bydd gennych lawer o ddarnau defnyddiol o wybodaeth ar flaenau eich bysedd.

Mae ap CThEF yn ei gwneud hi'n hawdd dod o hyd i wybodaeth fel eich cod treth diweddaraf, eich rhif Yswiriant Gwladol neu eich rhagolwg Pensiwn y Wladwriaeth.

Gallwch wirio eich incwm o'r gwaith yn y pum mlynedd blaenorol a faint o Dreth Incwm y dylech ei thalu, yn ogystal â hawlio ad-daliad treth os un yn ddyledus i chi. Gallwch hefyd hawlio a rheoli eich Budd-dal Plant neu ddiweddaru eich manylion personol fel enw neu gyfeiriad.

Os oes angen i chi ofalu am unrhyw un o'r tasgau hyn, gallai ap CThEF eu gwneud yn gyflymach ac yn symlach i'w cwblhau:

• hawlio a rheoli Budd-dal Plant, neu lawrlwythwch brawf o'r cais

• gweld rhagolwg eich Pensiwn y Wladwriaeth a gwirio am fylchau cyfraniadau Yswiriant Gwladol

• gwirio eich cod treth, darganfod a oes unrhyw dreth yn ddyledus i chi gan CThEF a hawlio ad-daliad os oes un yn ddyledus i chi

• diweddaru CThEF ar newid cyfeiriad neu fanylion personol eraill

• atgoffa eich hun o'ch rhif Yswiriant Gwladol, a'i gadw i'ch waled ffôn

• gweld neu lawrlwytho eich incwm a'ch hanes cyflogaeth o'r pum mlynedd diwethaf, a defnyddio teclynnau fel y cyfrifiannell dreth i amcangyfrif tâl mynd adref

• gwneud taliadau ar gyfer Hunanasesiad, Asesiad Syml, a hyd yn oed gosod nodiadau atgoffa talu

• cael mynediad i'ch cyfrif Cymorth i Gynilo i wirio eich cynilion a'ch bonws

• defnyddio cynorthwyydd digidol CThEF i gael arweiniad a chymorth.

Ar ôl i chi gael eich sefydlu, gallwch fewngofnodi yn gyflym ac yn ddiogel gan ddefnyddio'ch wyneb, olion bysedd neu iris, ar yr amod bod eich dyfais yn cefnogi hyn.

Gallwch hefyd ei ddefnyddio i ddweud wrth CThEF eich bod am fynd yn ddi-bapur, fel eich bod yn derbyn gohebiaeth ganddynt yn electronig.