Cofrestru i bleidleisio a phedair ffordd arall o helpu eich statws credyd
Cyhoeddwyd ar:
25 Ebrill 2021
Os hoffech chi fanteisio ar eich hawl i bleidleisio mewn etholiadau yn y dyfodol, mae'n rhaid i chi sicrhau bod eich enw ar y gofrestr etholiadol.
Ond oeddech chi'n gwybod bod cael eich cynnwys ar y rhestr swyddogol o bobl sy'n cael pleidleisio hefyd yn helpu i gryfhau eich statws credyd?
Bob tro y byddwch yn gwneud cais am gredyd fel morgais, yswiriant neu gerdyn credyd, mae'r darparwr yn gwirio'ch cofnod credyd. Os nad yw'ch sgôr o safon mae’n bosibl y byddwch yn cael eich gwrthod, sydd yn ei dro yn gwneud eich sgôr yn waeth byth.
Ond mae yna bethau y gallwch chi eu gwneud i wella'ch sgôr. Dyma bump i'ch rhoi ar ben ffordd.
1. Cofrestrwch i bleidleisio
Os nad ydych wedi cofrestru i bleidleisio, mae'n ei gwneud hi'n anodd i fenthycwyr wirio pwy ydych chi. Mae mynd ar y gofrestr etholiadol yn helpu yma. Gwnewch yn siŵr eich bod yn ailgofrestru os ydych yn symud tŷ.
2. Stopiwch wneud cais am gredyd
Os ydych chi'n cael eich gwrthod dro ar ôl tro am gredyd, stopiwch wneud cais! Eich opsiwn gorau yw cael adroddiad sefydlog oherwydd bob tro y cewch eich gwrthod, mae'n niweidio'ch sgôr.
3. Gwiriwch am gamgymeriadau
Gallwch gael copïau o'ch adroddiad gan bob un o'r tair prif asiantaeth gredyd am ffi benodol, er bod ffyrdd i'w gwirio am ddim hefyd. Mae'n werth edrych arnynt i weld a oes unrhyw wallau fel hen gyfeiriadau neu gais twyllodrus am gredyd yn eich enw.
4. Caewch gredyd nad ydych chi'n ei ddefnyddio
Mae benthycwyr yn edrych i weld beth sydd ar gael. Os oes cardiau nad ydych – ac na fyddwch – yn eu defnyddio, caewch y credyd. Nid yw hynny'n golygu torri'r cerdyn yn unig, er y dylech chi wneud hynny hefyd. Ffoniwch y darparwr a dywedwch wrtho yr hoffech chi ganslo'r cerdyn.
5. Talu ar amser
O filiau cardiau credyd i forgeisi, mae gwneud taliadau ar amser yn ffordd o osgoi marciau du. Mae'n dweud wrth y benthyciwr eich bod yn fenthyciwr diogel a synhwyrol, ac mae hynny'n eich gwneud yn llai o risg.
