Cyfrifon cynilo i blant

Mae cael eu cyfrif cynilo eu hunain yn gwneud i blant fod yn fwy ymwybodol o arian a gall eu hannog i ddatblygu arferion cynilo da fel oedolion.

Hyd nes y bydd eich plant yn ddigon hen i neilltuo rhywfaint o arian poced neu anrhegion arian pen-blwydd eu hunain, gallwch arbed ychydig iddynt bob mis. Sefydlwch archeb sefydlog i gronni cyfandaliad ar eu cyfer dros ychydig flynyddoedd.

Mae cyfrifon cynilo plant fwy neu lai yr un fath â rhai oedolion ac yn cael eu cynnig gan fanciau a chymdeithasau adeiladu. Mae ychydig o wahaniaethau, ond yn bennaf maent yn gyfrifon arian parod syml, diogel sydd fel arfer yn talu rhywfaint o log.

Gallwch agor cyfrif cynilo â dim ond £1 ar gyfer unrhyw blentyn hyd at 18 oed.

Gall plant dros saith oed reoli eu cyfrif cynilo eu hunain - yn dibynnu ar y cyfrif, gallant dynnu arian allan a'i dalu i mewn.

Mae hefyd gyfrifon treth-effeithlon o'r enw ISAs i bobl Iau - mwy amdanynt yn nes ymlaen.

Mae dau brif fath o gyfrifon cynilo i blant – cyfrifon mynediad rhwydd neu dim rhybudd a chyfrifon cynilo rheolaidd.

• Fel y mae’r enw’n ei awgrymu – gallwch chi neu eich plentyn godi neu adneuo arian unrhyw bryd.
• Fel arfer, cewch gyfradd llog is na mathau eraill o gyfrifon.

• Mae’r rhain wedi’u cynllunio i annog arferion cynilo rheolaidd – mae rhaid i chi gynilo arian yn y cyfrif bob mis, ac efallai na chewch ei dynnu allan yn hawdd.
• Fel arfer, maent yn talu cyfradd llog uwch na chyfrifon dim rhybudd.
• Gyda’r rhan fwyaf o gyfrifon, os byddwch yn colli rhai o’r taliadau misol efallai y caiff y gyfradd llog ei gostwng.

Mae llawer o fanciau a chymdeithasau adeiladu yn cynnig rhoddion am ddim fel teganau neu gadw-mi-gei, â’r nod o demtio plant, ond yn aml mae eu cyfrifon yn talu cyfradd llog isel.

Nid oes dim yn eich atal rhag agor mwy nag un cyfrif – un sy’n cynnig y gyfradd llog orau, a’r llall er mwyn i’r plentyn gael ei rodd am ddim

Fel oedolion, mae gan blant Lwfans Personol ar gyfer treth incwm – £12,570 ar gyfer y flwyddyn dreth 2023/24.

Os bydd eu hincwm blynyddol (gan gynnwys llog) islaw’r swm hwn, ni fydd rhaid iddynt dalu treth arno.

Gallwch roi unrhyw swm o arian i blentyn, neu ei fuddsoddi ar ei ran, ond os ydych yn rhiant neu’n lys-riant, mae rheolau arbennig yn gymwys:

• Os ydych wedi rhoi arian i’ch plentyn sy’n ennill dros £100 y flwyddyn mewn llog, difidendau, rhent neu unrhyw incwm arall o fuddsoddiad, codir treth ar y llog fel pe bai’n perthyn i chi. Nid yw hyn yn berthnasol i ISAs i Bobl Iau, Cronfeydd Ymddiriedolaeth Plant a Bondiau Plant (a enwir eisoes yn Bondiau Plant.)
• Nid yw hyn yn gymwys i unrhyw un arall – gall neiniau a theidiau a ffrindiau roi cymaint ag y mynnant. Fodd bynnag, gallai fod goblygiadau treth y byddwch am eu hystyried. Gallai rhoi arian parod ar yr adeg anghywir neu yn y ffordd anghywir olygu y cewch eich erlid gan y dyn treth ar ddyddiad diweddarach.

Mae ISAs i Bobl Iau a Bondiau Plant yn ddewis arall ar gyfer bod yn effeithlon â threth.

Gall plant gynilo hyd at £9,000 ar gyfer y flwyddyn dreth 2023/24 yn eu ISA i Bobl Iau, ac ni chodir treth ar y llog.

Gallant gyrchu’r arian pan ydynt yn 18 oed yn unig, a phryd hynny, hwy biau’r arian.

Mae gwefannau cymharu yn fan cychwyn da i unrhyw un sy'n ceisio dod o hyd i gyfrif cynilo wedi'i deilwra i'w hanghenion.

Nid yw gwefannau cymharu i gyd yn rhoi'r un canlyniadau i chi, felly gallai fod yn syniad da defnyddio mwy nag un safle cyn penderfynu. Mae hefyd yn bwysig gwneud rhywfaint o ymchwil i'r math o gynnyrch a nodweddion sydd eu hangen arnoch cyn prynu neu newid darparwr.