Sut i gael yswiriant car rhatach

Yn ôl Consumer Intelligence, yn ystod y flwyddyn ddiwethaf mae costau yswiriant car wedi codi tua 34%Yn agor mewn ffenestr newydd

Dyma rai ffyrdd o leihau cost yswiriant eich car i’w wneud mor fforddiadwy â phosibl. Gallwch hefyd ddarganfod beth yw cost gyfartalog yswiriant car.

Mae pob car mewn grŵp yswiriant gwahanol. Mae hyn yn seiliedig ar ffactorau fel:

• gwerth y car
• pa mor hir y byddai’n ei gymryd i atgyweirio
• perfformiad y car
• nodweddion diogelwch .

Mae’r grwpiau wedi’u rhifo o 1 i 50. Po isaf yw’r grŵp, yr isaf yw’r gost yswiriant.

Yn gyffredinol, bydd modelau llai a mwy economaidd mewn grwpiau yswiriant isel, tra bydd ceir ag injans pwerus mewn grwpiau uwch.

Gallwch wirio grŵp yswiriant car ar MoneySupermarketYn agor mewn ffenestr newydd

Weithiau gall ceir awtomatig fod yn ddrytach i’w yswirio oherwydd bod ganddynt gostau atgyweirio uwch.

Fodd bynnag, mae amrywiaeth eang o ffactorau y mae yswirwyr yn eu hystyried. Yn dibynnu ar eich yswiriwr, efallai na fydd cael car awtomatig yn gwneud gwahaniaeth i’ch costau yswiriant. 

Gall costau yswiriant ar gyfer ceir trydan fod yn uwch, oherwydd yn aml bydd ganddynt rhannau drud ac angen atgyweiriadau arbenigol os aiff unrhyw beth o’i le.

Er y gallai cost ac yswiriant y car fod yn uwch, mae’r costau rhedeg ar gyfer car trydan fel arfer yn is - felly meddyliwch a yw’n werth talu ychydig mwy mewn yswiriant.

Yn aml bydd ceir hŷn yn rhatach i’w yswirio oherwydd eu bod yn:

• llai gwerthfawr na char newydd
• rhatach i’w atgyweirio
• fwy tebygol o gael eu ‘dileu’ yn hytrach na’u hatgyweirio ar ôl damwain.

Po fwyaf o amser ac ymchwil rydych chi’n ei roi i gael dyfynbrisiau, y mwyaf tebygol yr ydych chi o gael bargen well.

Mae nifer o wefannau cymharu prisiau poblogaidd, gan gynnwys:

• Compare the MarketYn agor mewn ffenestr newydd
• GoCompareYn agor mewn ffenestr newydd
• MoneySuperMarketYn agor mewn ffenestr newydd

Mae’n syniad da defnyddio o leiaf dau wefan cymharu prisiau, gan nad yw pob yswiriwr ar bob gwefan. Gallwch hefyd ddefnyddio brocer yswiriant, a all fod yn ddefnyddiol os oes angen rhywbeth penodol arnoch yn eich polisi yswiriant.

Bydd y rhan fwyaf o wefannau cymharu prisiau yn rhoi tair lefel wahanol o yswiriant i chi ddewis ohonynt:

• Trydydd parti yn unig – mae hyn yn golygu rydych ddim ond wedi eich yswirio am ddifrod yr ydych yn ei achosi i geir neu eiddo eraill. Ni chewch eich talu am unrhyw ddifrod i’ch car.
• Trydydd parti, tân a lladrad – mae hyn yn cynnwys yswiriant trydydd parti, ond gyda diogelwch ychwanegol os yw eich car yn cael ei ddifrodi gan dân neu ei ddwyn.
• Cynhwysfawr – mae hyn yn cynnwys popeth uchod, ynghyd â difrod i’ch car a achosir gan ddamweiniau.

Mae’n synhwyrol cael yswiriant cynhwysfawr os gallwch, gan y bydd yr opsiynau eraill yn golygu eich bod mewn perygl o golli’ch car heb iawndal os cewch ddamwain.

Weithiau gall amseriad adnewyddu yswiriant car wneud gwahaniaeth i’r gost.

Mae ymchwil gan MoneySavingExpertYn agor mewn ffenestr newydd wedi canfod mai cael dyfynbrisiau yswiriant car 20-27 diwrnod cyn i’ch polisi ddechrau yw’r amser gorau i ddod o hyd i brisiau is.

Os ydych chi’n mynd i siarad â’ch yswiriwr i adnewyddu, gall fod yn syniad da galw yn ystod oriau tawelach y bore. Neu, fe allech chi siarad â nhw gyda'r nos pan fyddan nhw’n awyddus i gau bargeinion cyn diwedd y dydd.

Beth bynnag a wnewch, mae bob amser yn well cael dyfynbrisiau cyn i’ch yswiriant adnewyddu’n awtomateg.

Mae yna lawer o wahanol ffyrdd i geisio cael dyfynbrisiau yswiriant car rhatach. Dyma rai o’r pethau efallai yr hoffech roi cynnig arnynt.

Bydd cwmnïau yswiriant yn gofyn i chi faint o filltiroedd rydych chi’n eu gyrru bob blwyddyn. Dyma un ffactor a ddefnyddir i gyfrifo eich cost yswiriant cyffredinol.

Mae llai o filltiroedd yn golygu eich bod yn llai tebygol o gael damwain, felly bydd lleihau eich milltiroedd blynyddol fel arfer yn gostwng eich cost yswiriant.

Fodd bynnag, os ewch chi dros eich milltiroedd a bod angen i chi wneud cais yswiriant, efallai na fydd eich yswiriant yn ddilys mwyach – felly gwnewch yn siŵr eich bod yn rhoi milltiroedd cywir wrth edrych ar ddyfynbrisiau.

Gallai fod yn ddeniadol i fynd am lefel is o yswiriant i ostwng eich cost. Fodd bynnag, nid yw bob amser yn gweithio fel hyn.

Mae costau yswiriant yn seiliedig ar ‘risg’, ac weithiau gall yswiriant cynhwysfawr fod yn arwydd eich bod yn yrrwr mwy cyfrifol na phe baech yn cael yswiriant trydydd parti. Felly, efallai na fydd yn arbed unrhyw arian i chi leihau eich yswiriant.

Hefyd, meddyliwch am beth fyddai’n digwydd pe bai’ch car yn cael ei ddileu oherwydd damwain. Ni fyddech yn cael unrhyw iawndal, a byddech yn colli eitem sy’n costio miloedd o bunnoedd i chi (neu efallai y cewch eich cloi i wneud taliadau am gar nad oes gennych mwyach).

Mae gennych y dewis o dalu am eich yswiriant yn fisol neu’n flynyddol. Mae’r gost flynyddol fel arfer ychydig yn is na phe baech yn talu’n fisol, felly mae’n opsiwn os yw’n rhywbeth y gallwch ei fforddio.

Canolbwyntiwch yn unig ar y diogelwch sydd ei angen arnoch wrth gael dyfynbrisiau yswiriant. Efallai y bydd rhai yswirwyr yn ceisio taflu ychwanegion i mewn, gan gynnwys:

• gorchudd sgrin wynt
• defnydd o gar cwrteisi
• yswiriant costau cyfreithiol.

Meddyliwch yn ofalus a oes angen y pethau ychwanegol hyn arnoch. Os na, mae’n debygol y gallwch eu dileu i gael dyfynbris rhatach.

Ffordd arall o ostwng eich costau yswiriant yw ychwanegu gormodedd gwirfoddol. Dyma’r swm y bydd angen i chi ei dalu os byddwch yn gwneud hawliad yswiriant.

Mae gormodedd uwch fel arfer yn golygu cost is. Ond meddyliwch yn ofalus, gan fod siawns y bydd angen i chi dalu’r swm hwn os oes rhaid i chi wneud hawliad – felly gwnewch yn siŵr y byddech chi’n gallu ei fforddio.

Am bob blwyddyn rydych chi’n gyrru heb wneud hawliad ar eich yswiriant, byddwch chi’n cronni eich bonws dim hawliadau. Gall hyn roi gostyngiad mawr i chi – gall hyd yn oed blwyddyn o fonws dim hawliadau ostwng eich costau yswiriant tua 30%.

Os ydych yn symud i yswiriwr newydd, fel arfer gallwch drosglwyddo’ch bonws dim hawliadau i’ch darparwr newydd. Mae hyn yn golygu na fyddwch ar eich colled trwy ddod o hyd i fargen well rhywle arall.

Gallwch hefyd diogelu eich bonws dim hawliadau fel na fyddwch yn ei golli os byddwch yn cael damwain. Fodd bynnag, gall ei diogelu gynyddu eich costau adnewyddu ychydig. Dysgwch fwy yn ein blog A ddylwn i ddiogelu fy monws dim hawliadau?

Weithiau gall ychwanegu gyrrwr profiadol at eich polisi yswiriant car helpu i leihau’r gost. Mae hwn yn opsiwn da i yrwyr ifanc, a allai roi aelod o’r teulu ar eu polisi.

Sicrhewch fod pwy bynnag fydd yn defnyddio’r car fwyaf yn cael ei restru fel y prif yrrwr ar y polisi yswiriant. Os na wnewch hynny, byddwch yn cyflawni math o dwyll yswiriant car o’r enw ‘fronting’, sy’n anghyfreithlon.

Os ydych chi’n defnyddio car bob hyn a hyn yn unig, weithiau gall yswiriant talu wrth yrru fod yn opsiwn rhatach i chi.

Gyda’r polisïau hyn, byddwch yn talu cost yn seiliedig ar faint o amser neu filltiroedd rydych chi’n eu gyrru. Gallant fod yn rhatach os ydych chi’n gyrru yn ystod oriau tawelach.

Ond nid yw bob amser yn gweithio allan fel hyn - weithiau mae’r rhain yn cael eu hystyried yn bolisïau ‘risg uchel’ felly gallant fod yn llawer mwy costus yn y pen draw.

Dysgwch fwy yn ein blog Beth yw yswiriant car talu wrth yrru?

Os oes gennych fwy nag un car yn eich cartref, fel arfer mae’n rhatach cael polisi yswiriant aml-gar.

Bydd pob car ychwanegol fel arfer yn cael ei ychwanegu ar gyfradd ostyngol, gan ei gwneud yn ffordd dda o ostwng eich cost gyffredinol.

Mae yswiriant telemateg yn fath o bolisi lle mae dyfais fonitro wedi’i gosod yn eich car. Mae’n olrhain eich ymddygiad gyrru ac yn eich gwobrwyo â chost yswiriant is os yw’ch gyrru yn ddiogel.

Mae dyfynbrisiau yswiriant telemateg fel arfer ychydig yn rhatach, felly gall fod yn opsiwn da i yrwyr ifanc a diogel. Fodd bynnag, dim ond os ydych yn yrrwr diogel iawn y dylech feddwl am gael polisi telemateg, neu y gallech fod yn wynebu costau yswiriant uwch fyth.

Dysgwch fwy am yswiriant car i yrwyr ifanc.

Bydd angen i chi roi gwybod i’ch yswiriwr os yw’ch car wedi’i addasu mewn unrhyw ffordd.

Mae’n debygol y bydd eich costau yswiriant yn cynyddu os yw’ch car wedi’i addasu. Mae hyn oherwydd y gall addasiadau wneud atgyweiriadau’n ddrutach, a gallant hefyd wneud y car yn fwy deniadol i ladron.

Cwestiwn arall y bydd eich yswiriwr yn ei ofyn yw ble mae’ch car yn cael ei gadw.

Os oes gennych yr opsiwn i’w gadw mewn lleoliad diogel, yn enwedig oddi ar y stryd, gall hyn leihau eich costau yswiriant.

Mae yna reoliadau FCA sy’n atal yswirwyr rhag codi mwy ar gwsmeriaid presennol na rhai newydd. Fodd bynnag, nid yw hyn yn golygu eich bod yn cael y fargen orau os ydych yn aros gyda’ch darparwr presennol.

Mae bob amser yn well cymharu dyfynbrisiau gan ystod o yswirwyr cyn adnewyddu, gan fod siawns y byddwch chi’n dod o hyd i fargen rhatach a gwell.

Mae yna lawer o ffactorau eraill y bydd yswirwyr yn eu hystyried wrth gyfrifo eich costau yswiriant. Mae hyn yn cynnwys:

• eich oedran
• eich hanes gyrru (megis os ydych wedi cael tocyn goryrru neu ddamwain)
• eich swydd
• os ydych yn defnyddio’r car i deithio i waith
• lle rydych chi’n byw.

Gallwch ddod o hyd i ragor o help ynghylch cael yswiriant os oes gennych gollfarn.