Mae prynu eiddo dramor fel arfer yn fwy cymhleth na phrynu’n lleol. Bydd angen i chi ystyried nifer o risgiau ac efallai y bydd angen i chi gyfrifo sut i gael morgais ar gyfer eiddo tramor.
Ymgyfarwyddwch â’r risgiau wrth brynu eiddo dramor
- Treth – gwnewch yn siŵr eich bod yn ystyried yr holl dreth y bydd rhaid ichi ei thalu, yn y Deyrnas Unedig ac yn y wlad lle rydych wedi prynu’r eiddo.
- Gwiriwch y gwaith papur – gwnewch yn siŵr bod gennych yr holl ganiatadau, trwyddedau a chydsyniadau cynllunio angenrheidiol cyn ichi lofnodi unrhyw fath o gontract neu gytundeb.
- Newidiadau yn y gyfradd gyfnewid – gallai hyd yn oed newid bach i'r gyfradd gyfnewid wneud gwahaniaeth mawr i werth eich eiddo dramor. Gallai hyn wneud cadw i fyny â thaliadau morgais yn anfforddiadwy.
- Byddwch yn ofalus gyda datblygwyr sydd â dulliau gwerthu cymhellol – peidiwch ag ildio i bwysau trwm i dalu blaendal cyn eich bod wedi cael cyfle i feddwl yn ofalus a cheisio cyngor annibynnol
Cael morgais ar gyfer eiddo tramor
Os oes gennych forgais yn yr EAA (Ardal Economaidd Ewropeaidd) lle rydych yn gwneud ad-daliadau mewn arian tramor, rhaid i’r darparwr benthyciadau ddweud wrthych os bydd y gyfradd cyfnewid yn amrywio fwy nag 20%.
Gallai’r amrywiaethau hyn effeithio ar eich gallu i dalu eich morgais yn y dyfodol.
I ddiogelu benthycwyr, rhaid i ddarparwyr benthyciadau gynnig y dewis i chi ad-dalu’r morgais mewn arian gwlad arall.
Darganfyddwch fwy am gael morgais dramor, ar wefan Which?Yn agor mewn ffenestr newydd
Ceisiwch gyngor cyfreithiol ac ariannol annibynnol
“Rydym yn argymell yn gryf bod pobl sy’n ystyried prynu eiddo dramor yn ceisio cyngor cyfreithiol ac ariannol annibynnol ar bob cam o’u pryniad.”
Ffynhonnell: Y Swyddfa Dramor a Chymanwlad
Ceisiwch gyngor cyfreithiol bob tro gan gyfreithiwr sy’n annibynnol o bawb arall sy’n gysylltiedig â’r gwerthiant. yn cynnwys
- y gwerthwr
- y datblygwr a’r
- asiant tai.
Sicrhewch fod eich cyfreithiwr yn rhugl yn Saesneg a’r iaith leol, a’u bod yn deall cyfraith eiddo yn y wlad rydych yn prynu ynddi a sut mae’r gyfraith honno’n perthyn i bobl nad ydynt yn breswylwyr.
Os ydych yn penodi cwmni cyfreithiol yn y Deyrnas Unedig, gwiriwch eu bod wedi’u cofrestru gyda Chymdeithas y Cyfreithwyr yn y Deyrnas Unedig a’u bod yn arbenigo mewn trafodion rhyngwladol a throsglwyddo eiddo.
Dod o hyd i gynghorydd cyfreithiol:
- ar wefan Cymdeithas y Cyfreithwyr Cymru a Lloegr
- ar wefan Cymdeithas Cyfreithwyr Yr Alban
- ar wefan Cymdeithas Cyfreithwyr Gogledd Iwerddon
Os ydych yn penodi cynghorydd yn y wlad lle rydych yn prynu’r eiddo, dylai fod yn bosibl i chi ddod o hyd i restrau o bobl broffesiynol sy’n siarad Saesneg ar wefan eich Llysgenhadaeth Brydeinig leol.
Cyngor ariannol
Gallwch ddod o hyd i gynghorwr ariannol annibynnol trwy’r dolenni isod.
Mae pob un o’r gwefannau canlynol yn caniatáu i chi chwilio yn ôl cod post a rhai am gynghorwyr arbenigol yn unig.
Os nad ydych yn siŵr sut i fynd ati i ddewis y cynghorydd ariannol cywir, gweler ein canllaw Dewis cynghorydd ariannol
Os bydd pethau’n mynd o chwith wrth brynu tramor
Ni reoleiddir pryniad eiddo tramor gan yr Awdurdod Ymddygiad Ariannol (FCA) felly ni chewch eich diogelu gan Wasanaeth yr Ombwdsmon Ariannol na’r Cynllun Digolledu Gwasanaethau Ariannol os bydd pethau’n mynd o chwith.
Hyd yn oed os defnyddiwch gynghorydd ariannol neu frocer morgeisi a gofrestrir gyda’r FCA yn y Deyrnas Unedig i drefnu’r pryniant ar eich rhan.
